जिजाऊ चौक ते बळीराम पाटील रस्त्यावरील अतिक्रमणांवर मनपाचा हातोडा:स्थानिकांचा विरोध झुगारून 24 हातगाड्या जप्त, 51 शेड्स भुईसपाट

छत्रपती संभाजीनगर महानगरपालिकेने जिजाऊ चौक ते बळीराम पाटील रस्त्यावरील अतिक्रमणांवर शुक्रवारी (१७ जुलै) मोठी कारवाई केली. या मोहिमेत २४ हातगाड्या जप्त करण्यात आल्या असून, ५१ अनधिकृत शेड्स निष्कासित करण्यात आले आहेत. गेल्या काही दिवसांपासून या मार्गावर वाढलेले अतिक्रमण आणि अस्ताव्यस्त उभ्या राहणाऱ्या हातगाड्यांमुळे नागरिकांना वाहतूक कोंडीचा सामना करावा लागत होता. या समस्येची गंभीर दखल घेऊन महानगरपालिका आयुक्त अमोल येडगे यांच्या आदेशानुसार ही कारवाई करण्यात आली. अतिक्रमण विभागाचे सनियंत्रण अधिकारी संतोष वाहुळे यांच्या नेतृत्वाखालील पथकाने जिजाऊ चौक ते बळीराम पाटील रोडवर अचानक धडक दिली. रस्त्याच्या दुतर्फा असलेल्या अतिक्रमणांवर कारवाई सुरू होताच स्थानिक दुकानदारांनी व हातगाडीचालकांनी या मोहिमेला तीव्र विरोध दर्शवला. मात्र, मनपाच्या अधिकाऱ्यांनी व पथकाने हा विरोध जुगारून कारवाई सुरूच ठेवली आणि रस्ता अतिक्रमणमुक्त केला. या धडक मोहिमेमुळे वाहतुकीला मोठा अडथळा ठरणारे ५१ शेड्स भुईसपाट करण्यात आले, तर २४ हातगाड्या जप्त करून कारवाई करण्यात आली. या मोहिमेत सहाय्यक आयुक्त संजय सुरडकर, इमारत निरीक्षक रवींद्र देसाई, प्राप्ती जाधव, अशोक कदम यांच्यासह नागरी मित्र पथकाचे जवान आणि अतिक्रमण हटाव विभागाचे कर्मचारी मोठ्या संख्येने उपस्थित होते. या कारवाईमुळे रस्ता मोकळा झाल्याने वाहनधारकांनी समाधान व्यक्त केले आहे.