मएसो क्रीडा करंडक 2026 चे उद्घाटन:आंतरराष्ट्रीय जलतरणपटू मिहीर आंब्रे यांचे खेळाडूंना मार्गदर्शन

पुणे येथे महाराष्ट्र एज्युकेशन सोसायटीच्या (मएसो) ‘क्रीडा करंडक’ राज्यस्तरीय आंतरशालेय क्रीडा स्पर्धेचे उद्घाटन आंतरराष्ट्रीय जलतरणपटू मिहीर आंब्रे यांच्या हस्ते झाले. बालशिक्षण मंदिर इंग्लिश मिडीयम स्कूल, मयूर कॉलनी, कोथरूड येथे आयोजित या कार्यक्रमात आंब्रे यांनी विद्यार्थ्यांना मार्गदर्शन करताना सांगितले की, मनातली जिद्द आणि सातत्यपूर्ण सरावानेच एक चांगला खेळाडू घडतो. स्पर्धेचे उद्घाटन मिहीर आंब्रे यांनी शुभंकर ‘वीर मॅस्कॉट’ आणि फुगे सोडून, तसेच ज्योत पेटवून केले. महाराष्ट्र एज्युकेशन सोसायटीचे अध्यक्ष एअरमार्शल (निवृत्त) भूषण गोखले यांनी कार्यक्रमाचे अध्यक्षस्थान भूषवले. यावेळी ‘मएसो’च्या नियामक मंडळाचे अध्यक्ष बाबासाहेब शिंदे, उपाध्यक्षा आनंदी पाटील, क्रीडावर्धिनी व शाला समितीचे अध्यक्ष विजय भालेराव, ‘मएसो’चे सचिव अतुल कुलकर्णी यांच्यासह संस्थेचे अनेक पदाधिकारी उपस्थित होते. विद्यार्थ्यांना संबोधित करताना मिहीर आंब्रे म्हणाले की, खेळ केवळ शारीरिक तंदुरुस्तीच देत नाहीत, तर आयुष्यात उपयोगी पडणाऱ्या अनेक गोष्टी शिकवतात. खेळात हार-जीत महत्त्वाची नसून, खिलाडूपणाची भावना मोठी असते. खेळ आपल्याला शिस्त, एकाग्रता आणि संघभावना शिकवतात. शालेय वयातच क्रीडा संस्कृती रुजल्यास भविष्यात कोणताही खेळ खेळणे सोपे होते, असेही त्यांनी नमूद केले. एअरमार्शल (निवृत्त) भूषण गोखले यांनी आपल्या भाषणात मिहीर आंब्रे यांच्या यशाचे कौतुक केले. मिहीरच्या क्रीडाप्रेमाची सुरुवात याच शाळेतून झाली असून, त्याने आंतरराष्ट्रीय स्तरावर नाव कमावले आहे. विद्यार्थ्यांनी त्याचा आदर्श घ्यावा आणि मनात जिद्द व ध्यास ठेवावा, असे आवाहन गोखले यांनी केले. बालशिक्षण मंदिर शाळेचे माजी विद्यार्थी असल्याने, मिहीर आंब्रे यांनी व्यासपीठावरील औपचारिकता बाजूला ठेवून विद्यार्थ्यांमध्ये जाऊन त्यांच्याशी थेट संवाद साधला. प्रास्ताविकात विजय भालेराव यांनी स्पर्धेविषयी माहिती दिली. ही स्पर्धा पर्यावरणपूरक असून, ‘मएसो क्रीडा करंडक’चे हे १४ वे वर्ष आहे. संस्थेव्यतिरिक्त अन्य पाच शाळांमधील खेळाडू या स्पर्धेत सहभागी झाले आहेत. खेळामुळे शिस्त आणि संघभावना निर्माण होते, असे भालेराव यांनी सांगितले.