अमरावती येथील महादेव खोरी स्थित उर्गेन संघरक्षित इंटरनॅशनल स्कूलच्या विद्यार्थ्यांनी इंडियन टॅलेंट ऑलिम्पियाड परीक्षेत राज्यस्तरीय उल्लेखनीय यश मिळवले आहे. इयत्ता पाचवीतील रेयांश धवळे याने तिसरा, तर इयत्ता नववीतील मृण्मयी उके हिने सातवा राज्यस्तरीय क्रमांक पटकावला. या दोन्ही विद्यार्थ्यांना त्यांच्या उत्कृष्ट कामगिरीबद्दल इंडियन टॅलेंट ऑलिम्पियाडतर्फे शिष्यवृत्ती प्रदान करण्यात आली आहे. त्यांच्या या यशाने शाळेच्या शिरपेचात मानाचा तुरा खोवला गेला आहे. यासोबतच, शाळेच्या के.जी. २ ते इयत्ता चौथीपर्यंतच्या विद्यार्थ्यांनीही अबॅकस स्पर्धेत उत्कृष्ट कामगिरी करत घवघवीत यश संपादन केले. यामुळे शाळेच्या गुणवत्तापूर्ण शिक्षणाची आणि सर्वांगीण विकासासाठी राबविण्यात येणाऱ्या उपक्रमांची प्रचिती आली आहे. विद्यार्थ्यांच्या या यशाबद्दल मुख्याध्यापक प्रविणा चिंचोळे, संस्थेच्या अध्यक्ष धम्मचारिणी हिरा रक्षित, धम्मचारी रत्नराज रक्षित, आनंद प्राथमिक शाळेच्या शिक्षिका स्मिता रक्षित, तसेच सर्व शिक्षक व शिक्षकेतर कर्मचाऱ्यांनी विद्यार्थ्यांचे व त्यांच्या पालकांचे मनःपूर्वक अभिनंदन केले. विद्यार्थ्यांचे सातत्यपूर्ण परिश्रम, पालकांचे सहकार्य आणि शिक्षकांचे योग्य मार्गदर्शन यामुळे हे यश शक्य झाल्याचे त्यांनी सांगितले. या उल्लेखनीय यशामुळे उर्गेन संघरक्षित इंटरनॅशनल स्कूलच्या गुणवत्तापूर्ण शिक्षणाची आणि विद्यार्थ्यांच्या सर्वांगीण विकासासाठी घेतल्या जाणाऱ्या प्रयत्नांची पुन्हा एकदा राज्यस्तरावर दखल घेण्यात आली आहे. संपूर्ण परिसरातून विद्यार्थ्यांवर आणि शाळेवर अभिनंदनाचा वर्षाव होत आहे.
उर्गेन स्कूलच्या विद्यार्थ्यांचे ऑलिम्पियाडमध्ये राज्यस्तरीय यश:रेयांशला तिसरा, मृण्मयीला सातवा क्रमांक; अबॅकसमध्येही प्राविण्य
