पुण्यात निओलाइट झेडकेडब्ल्यूची नवीन ऑटोमोटिव्ह लाइटिंग सुविधा सुरू:70 कोटींची गुंतवणूक, 500 जणांना रोजगार मिळणार

निओलाइट झेडकेडब्ल्यू लाइटिंग्स लिमिटेडने महाराष्ट्रातील पुणे जिल्ह्यातील चाकण येथे आपली नवीन अत्याधुनिक ऑटोमोटिव्ह लाइटिंग उत्पादन सुविधा सुरू केली आहे. झेड.के.डब्ल्यू. ग्रुप जीएमबीएचचे मुख्य कार्यकारी अधिकारी (सीईओ) वॉन योंग ह्वांग यांच्या हस्ते या सुविधेचे उद्घाटन झाले. या प्रकल्पात सुमारे 70 कोटी रुपयांची गुंतवणूक करण्यात आली असून, त्यातून 500 जणांना रोजगार मिळणार आहे. निओलाइट झेडकेडब्ल्यू ही पॅसेंजर, व्यावसायिक, ऑफ-रोड, दुचाकी आणि तीनचाकी वाहनांसाठी ओईएम ऑटोमोटिव्ह लाइटिंग उत्पादने तयार करणारी जागतिक स्तरावरील एक प्रमुख पुरवठादार कंपनी आहे. ही नवीन सुविधा मुंबई-पुणे-नाशिक-औरंगाबाद या प्रमुख ऑटोमोटिव्ह क्लस्टरच्या जवळ असल्याने लॉजिस्टिक्स, जलद पुरवठा आणि कार्यक्षम इन्व्हेंटरी व्यवस्थापनात मदत होईल. या प्रकल्पामुळे जेएसडब्ल्यू एमजी मोटर इंडिया, स्टेलेंटिस ऑटोमोबाईल्स इंडिया, व्हीई कमर्शियल व्हेइकल्स, डेमलर इंडिया कमर्शियल व्हेइकल्स, इसुझू मोटर्स इंडिया, टाटा मोटर्स आणि पियाजिओ व्हेइकल्स यांसारख्या प्रमुख ग्राहकांच्या गरजा अधिक प्रभावीपणे पूर्ण करता येतील. उत्पादन सुविधेसोबतच, कंपनीने एक स्वतंत्र आणि अत्याधुनिक डिझाइन केंद्रही स्थापन केले आहे. या केंद्रात आधुनिक डिझाइन टूल्स, सिम्युलेशन सॉफ्टवेअर, थ्रीडी मॉडेलिंग, ऑप्टिकल डिझाइन आणि प्रोटोटायपिंगच्या सुविधा आहेत. यामुळे उत्पादन विकासाचा कालावधी कमी होईल आणि जागतिक दर्जा व नियामक मानकांची पूर्तता सुनिश्चित केली जाईल. याप्रसंगी बोलताना झेड.के.डब्ल्यू. ग्रुपचे सीईओ वॉन योंग ह्वांग म्हणाले, “भारत हा जागतिक ऑटोमोटिव्ह उद्योगासाठी एक महत्त्वाचा धोरणात्मक बाजार बनत आहे. पुण्यातील हा विस्तार भविष्यातील ऑटोमोटिव्ह लाइटिंग सोल्यूशन्ससाठी निर्णायक ठरेल.” निओलाइट झेडकेडब्ल्यू लाइटिंग्स लिमिटेडचे अध्यक्ष व व्यवस्थापकीय संचालक राजेश जैन यांनी सांगितले की, हा प्रकल्प क्षमता, तंत्रज्ञान आणि प्रतिभेमधील गुंतवणुकीचे प्रतीक आहे. पुढील टप्प्यात कांचीपुरम येथेही प्रकल्प सुरू करण्याचे कंपनीचे उद्दिष्ट आहे. कंपनीचे सीईओ राजेश सोनी यांनी स्पष्ट केले की, पुण्यातील ही सुविधा मोल्डिंग, सरफेस ट्रीटमेंट आणि असेंब्लीवर लक्ष केंद्रित करेल. तसेच, इलेक्ट्रिक वाहनांसाठी खास लाइटिंग सोल्यूशन्स विकसित करण्यात ती महत्त्वाची भूमिका बजावेल.