प्रतिनिधी | अमरावती प्रतिभा ही जन्मजात किंवा आत्मसात केलेली असू शकते. ही परमेश्वराकडून मिळालेली देणगी आहे. जी कठोर परिश्रम आणि सरावाने विकसित होते. शहरातील दिल्ली पब्लिक स्कूलच्या विद्यार्थ्यांनी पुन्हा एकदा सिद्ध केले, की ते प्रत्येक क्षेत्रासाठी सक्षम आहेत. शाळेचा वार्षिक समारंभ उत्साहात साजरा करण्यात आला. या प्रेरणादायी कार्यक्रमात विद्यार्थ्यांनी संत गाडगे बाबा, लोकमान्य टिळक, सावित्रीबाई फुले आणि संत तुकडोजी महाराज यांना भावपूर्ण श्रद्धांजली वाहिली. तसेच शाळेच्य सभागृहात विविध कलेचे मनमोहक सादरीकरण केले, यावेळी उपस्थितांना स्तब्ध केले. यावेळी डीपीएस मधील जागतिक दर्जाच्या सुविधा आणि मुलांच्या नैसर्गिक क्षमतांनी उपस्थित मान्यवरांकडून कौतुकाचा वर्षाव केला. यावेळी माजी खासदार नवनीत राणा, डॉ. राजेंद्र सिंग अरोरा, डॉ रोहित हटगाओंकर, डॉ. अभिलाष चव्हाण, शिक्षण विभाग उपसंचालक नीलिमा टाके, डोलेंद्र पाटील, प्राचार्य हिमाद्री देसाई आदी मान्यवर उपस्थित होते. मान्यवरांनी माता सरस्वती, भगवान नटराज यांच्या प्रतिमांना माल्यार्पण केले. सुरुवातीला दिल्ली पब्लिक स्कूलच्या मुलांनी विविध वाद्यांसह सरस्वती वंदना सादर केली. त्यानंतर नर्सरी, एलकेजी आणि यूकेजी वर्गातील लहान मुलांनी स्कूल चले हम, अग्गोबाई दग्गोबाई, ये जी बाई, “सत्य शोधक, जीवन सार्थक करा या गाण्यांवर मनमोहक नृत्य सादर करून उत्साह वाढवला. या वार्षिक महोत्सवाची थीम संतांवर आधारित होती. तसेच विविध प्रदेशातील पारंपारिक नृत्य आणि संगीत सादर केले. इयत्ता पहिली आणि दुसरीच्या विद्यार्थ्यांनी नृत्याद्वारे संतांचे शिक्षणातील योगदान व्यक्त केले. नृत्यनाट्याद्वारे, इयत्ता तिसरीतील विद्यार्थ्यांनी संत गाडगे महाराजांनी समाजात स्वच्छतेला कसे प्रोत्साहन दिले हे प्रेक्षकांसमोर यावेळी सादर केले. त्याचप्रमाणे, संत तुकडोजींनी दिलेला मानवतेचा संदेश इयत्ता आठवीच्या विद्यार्थ्यांनी नृत्याद्वारे सादर केला. इयत्ता चौथीच्या विद्यार्थ्यांनी जीवनात भक्तीचे महत्त्व देखील अतिशय प्रेरणादायी पद्धतीने सादर केले. अशाप्रकारे, या समाजसुधारक संतांनी दिलेले शिक्षण आणि संदेश विविध वर्गातील विद्यार्थ्यांनी नृत्यनाट्याद्वारे सादर केले. कार्यक्रमाला शिक्षक, शिक्षकेतर कर्मचारी उपस्थित होते.
डीपीएस येथे वार्षिक समारंभ निर्मोचन:अद्भुत, अविस्मरणीय रंगीत सादरीकरण, एक विहंगम दृश्य
