बँकेच्या सीडीएममध्ये (कॅश डिपॉझिट मशीन) अज्ञाताने बनावट नोटा भरल्याचा प्रकार उघडकीस आला आहे. गुरुवारी गारखेडा परिसरातील आयडीएफसी फर्स्ट बँकेत हा प्रकार घडला. यात ५०० रुपयांच्या ९ नोटा बनावट असल्याचे आढळले. याप्रकरणी पुंडलिकनगर पोलिस ठाण्यात गुन्हा दाखल करण्यात आला आहे. फिर्यादी बँकेचे शाखा प्रबंधक नीलेश शिंधीकर (४०, रा. गारखेडा) यांच्या तक्रारीनुसार, बँकेच्या ‘सीडीएम’मध्ये जमा झालेली रक्कम एकत्रित गोळा करून शाखेत आणली जाते. त्यात २७ जानेवारी रोजी रात्री एकाने १२ हजार रुपये जमा केले होते. त्यात ५०० रुपयांच्या २४ नोटांचा समावेश होता. मात्र, त्यातील ९ नोटा या बनावट असल्याचे लक्षात आले. त्यामुळे त्यांनी पुन्हा एकदा खातरजमा करून पोलिस ठाण्यात धाव घेतली. याप्रकरणी संबंधित खातेधारकालादेखील पत्र दिले.
बँकेला चुना लावण्याचा प्रयत्न:गारखेड्यात आयडीएफसी फर्स्ट बँकेच्या सीडीएममध्ये भरल्या चक्क बनावट नोटा
