‘वाहन फिटनेस’चे खासगीकरण, शहरात सेंटर सुरू:आरटीओ, निरीक्षकांविना वाहन तपासणीला सुरुवात, दोन ट्रॅकवर दहा वाहनांची तपासणी

राज्यातील वाहन फिटनेस चाचणीचे पहिले खासगी सेंटर छत्रपती संभाजीनगरमध्ये सुरू झाले आहे. येथे आरटीओ, मोटार वाहन निरीक्षकांविना फिटनेस चाचणी करता येणार आहे. लाइट मोटार व हेवी मोटार व्हेइकल अशा दोन ट्रॅकवर एकाच लाइनमध्ये दहा वाहनांची तपासणी क्षमता असून एका वाहनाला १२ ते २० मिनिटे लागतात. शासकीय सेंटर उद्घाटनाच्या प्रतीक्षेत : राज्यात नाशिक व छत्रपती संभाजीनगर करोडी येथील आरटीओ कार्यालयात अत्याधुनिक तंत्रज्ञानावर आधारित स्वयंचलित वाहन तपासणी केंद्र उभारले आहे. दोन लाइट व दोन हेवी असे एकूण चार अत्याधुनिक ट्रॅक असून त्यावर एकाच वेळी १२ वाहनांची चाचणी करण्याची क्षमता आहे. प्रति सेंटरसाठी २३ कोटी रुपये खर्च करण्यात आले आहेत. नाशिकचे सेंटर सुरू झाले, मात्र करोडीतील वाहन फिटनेस चाचणीला सुरुवात करण्यात आलेली नाही. अशी होते चाचणी वाहन प्रवेशद्वारावर येताच व्हिडिओ चित्रीकरण केले जाते. सर्वप्रथम टायर व त्यातील एअर प्रेशर तपासले जाते. त्यानंतर हॉर्न प्रेशर, धूर, स्पीड टेस्ट, ब्रेक टेस्ट, स्टेअरिंग टेस्ट, गाडीचे इंजिन, ग्लास, सीट ब्लेट, हे लाइट, इंडिकेटर्स, वाहनाच्या खालच्या बाजूचे एक्सल, टायर, पाटे आदींची यंत्राद्वारे तपासणी करून फिटनेस अहवाल संगणकावरच अपलोड करून प्रमाणपत्र दिले जाते. मॅन्युअली चाचणीला लगाम केंद्र व राज्य सरकारने मॅन्युअली वाहन फिटनेस चाचण्या व प्रमाणपत्र देण्यावर १ जानेवारीपासून निर्बंध घातले आहेत. ऑटोमेटेड टेस्टिंग स्टेशनचेही खासगीकरण करण्यात आले आहे. केवळ स्वयंचलित चाचणी केंद्रातच फिटनेस चाचणी करणे बंधनकारक करण्यात आले आहे. हस्तक्षेप करता येत नाही चाचणीसाठी अत्याधुनिक मशीन आहे. ट्रॅकवर वाहन आल्यानंतर चाचण्यांमध्ये कुणालाही हस्तक्षेप करता येत नाही. सीसीटीव्ही आहेत. इंजिनिअर नियुक्त केलेले आहेत. चाचणीसाठी निर्धारित शुल्क घेतले जाते. – किशोर सोमवंशी, व्यवस्थापक, खासगी एटीएस
फक्त लूट होऊ नये खासगी सेंटरच्या माध्यमातून वाहन फिटनेससाठी अनेक त्रुटी काढणे, त्या पूर्ण करण्यासाठी अनावश्यक खर्च करायला लावणे, दंडाची रक्कम भरण्यासाठी सक्ती करणे आदी प्रकारची लूट होऊ नये, अशी अपेक्षा आहे. – अब्दुल खान, वाहनचालक