प्रतिनिधी | पाळधी येथे जीपीएस मित्र परिवाराच्या पुढाकाराने उपमुख्यमंत्री अजित पवार यांना सर्वपक्षीय श्रद्धांजली अर्पण करण्यात आली. या श्रद्धांजली सभेस सर्व राजकीय पक्षांचे पदाधिकारी, लोकप्रतिनिधी, सामाजिक कार्यकर्ते, नागरिक उपस्थित होते. त्यांनी सामान्य जनतेसाठी झटणारा नेता हरपल्याच्या भावना व्यक्त केल्या. श्रद्धांजली सभेत धरणगाव प. स.चे माजी सभापती मुकुंदराव नन्नवरे यांनी अजित पवार हे केवळ पक्षाचे नव्हे तर राज्याचे नेतृत्व करणारे व्यक्तिमत्त्व होते, असे सांगितले. या वेळी सरपंच विजय पाटील, शरद कोळी, उपसरपंच निसार देशमुख, प्रसाद शिंदे, अनिल माळी यांच्यासह सर्वपक्षीय कार्यकर्ते, पदाधिकारी आदी मोठ्या संख्येने उपस्थित होते. जि.प.चे माजी सदस्य प्रतापराव पाटील यांनी कठोर शिस्त, निर्णयक्षम नेतृत्व, प्रशासनावर असलेली पकड आणि सामान्य जनतेसाठी झटणारा नेता म्हणून अजित पवार यांची ओळख असल्याचे नमूद केले. अजित पवारांचे नेतृत्व राज्यासाठी किती महत्त्वाचे होते हे त्यांनी भावनिक शब्दांत मांडले. तसेच प्रा संजय पाटील, डॉ. व्ही. डी. पाटील, अरविंद मानकरी, माजी सभापती सचिन पवार यांनी देखील विविध आठवणी सांगितल्या.
जनतेसाठी झटणारा नेता हरपला:पाळधीत अजित पवार यांच्या श्रद्धांजली सभेतील भावना
