वसमत ते चोंढी मार्गावर कोर्टाफाटा शिवारात बँकेची रोकड नेणाऱ्या कर्मचाऱ्याच्या दुचाकीला कारने धडक देऊन दुसऱ्या दुचाकीवर आलेल्या चोरट्यांनी १० लाखांची रोकड पळविल्याची घटना शुक्रवारी ता. ९ सकाळी साडे दहा वाजण्याच्या सुमारास घडली आहे. पोलिसांच्या पथकाने
.
पोलिसांनी दिलेल्या माहितीनुसार, वसमत तालुक्यातील चोंढी येथे जिल्हा मध्यवर्ती बँकेचे शाखा आहे. याशाखेतील कर्मचारी ज्ञानेश्वर भोसले हे नेहमी प्रमाणे रोकड आणण्यासाठी त्यांच्या दुचाकी वाहनावर वसमत येथे गेले होते. वसमत जिल्हा मध्यवर्ती बँकेच्या शाखेतून १० लाख रुपयांची रोकड घेऊन ते परत चोंढी येथे येत असतांना कोर्टा फाटा शिवारात पाठीमागून येणाऱ्या स्विफ्ट डिझायर कारने त्यांच्या दुचाकीला धडक दिली. यामुळे ज्ञानेश्वर हे खाली पडले.
यावेळी पाठीमागून दोन दुचाकीवर आलेल्या चौघांनी ज्ञानेश्वर यांना धमकी देऊन त्याच्याकडील दहा लाख रुपये रोकड असलेली बॅग पळविली. अचानक घडलेल्या या प्रकारामुळे ज्ञानेश्वर घाबरून गेले. त्यांनी तातडीने वरिष्ठ अधिकाऱ्यांना माहिती दिली. तर या घटनेची माहिती मिळताच कुरुंदा पोलिस ठाण्याचे सहाय्यक पोलिस निरीक्षक रामदास निरदोडे, जमादार संदीप टाक, भगीरथ सवंडकर, भुरके, भालेराव, विनायक जानकर यांच्यासह पोलिसांनी घटनास्थळी धाव घेतली.
दरम्यान, पोलिसांनी सर्व पोलिस ठाण्यांना माहिती दिली शिवाय काही गावकऱ्यांनाही माहिती दिली. पुयनी शिवारात गावकरी व पोलिसांनी दोन संशयीतांना ताब्यात घेतले असून त्यांची कसून चौकशी सुरु आहे. या घटनेमुळे जिल्हाभरात एकच खळबळ उडली आहे.
बँक शाखेपर्यंत रोकड पोहोचविण्याची गरज
जिल्हामध्यवर्ती बँकेच्या कर्मचाऱ्यांना जिव धोक्यात घालून रोकडची वाहतूक करावी लागत आहे. त्यामुळे तालुका शाखेने किंवा मुख्य शाखेने जिल्हाभरातील इतर शाखेपर्यंत रोकड पुरवठा केल्यास या घटना घडणार नसल्याचे बोलले जात आहे.
