माजी केंद्रीय रेल्वे राज्यमंत्री, पुण्याचे खासदार आणि भारतीय ऑलिम्पिक महासंघाचे माजी अध्यक्ष सुरेश कलमाडी यांना शुक्रवारी पुण्यात श्रद्धांजली वाहण्यात आली. शहरातील विविध क्षेत्रांतील मान्यवरांनी बंडगार्डन रस्त्यावरील पूना क्लब येथे आयोजित श्रद्धांजली
.
सुरेश कलमाडी (वय ८१) यांचे मंगळवारी निधन झाले होते. कलमाडी कुटुंबीयांच्या वतीने या श्रद्धांजली सभेचे आयोजन करण्यात आले होते. यावेळी त्यांच्या पत्नी मीरा कलमाडी, चिरंजीव सुमीर, सून नंदिता आणि कन्या सोनाली व पायल यांचे मान्यवरांनी सांत्वन केले.
पूना क्लबमधील हिरवळीवरील मांडवात विशेष व्यवस्था करण्यात आली होती. फुलांनी सजवलेल्या व्यासपीठावर सुरेश कलमाडी यांची तसबीर ठेवण्यात आली होती. मान्यवरांनी तसबिरीला फुले वाहून आणि दर्शन घेऊन त्यांना आदरांजली वाहिली. संपूर्ण मांडवात उदबत्तीचा सुवास दरवळत होता.
व्यासपीठावर लावण्यात आलेल्या स्क्रीनवर सुरेश कलमाडी यांची विविध छायाचित्रे झळकत होती. बालपणापासून ते तरुणपणातील, राष्ट्रीय संरक्षण प्रबोधिनी (एनडीए), हवाई दलातील, राजकारणातील, पुणे फेस्टिवल, पुणे आंतरराष्ट्रीय चित्रपट महोत्सव आणि क्रीडा स्पर्धांमधील छायाचित्रांनी त्यांच्या जीवनाचा पट उपस्थितांसमोर उलगडला.
सुरेश कलमाडी यांच्या विविध क्षेत्रांतील कार्यामुळे राजकीय, सामाजिक, उद्योग, कला, क्रीडा, शिक्षण, आर्थिक आणि आरोग्य अशा क्षेत्रांतील नामवंतांची मांदियाळी या सभेला जमली होती. कलमाडी यांनी नावीन्याचा ध्यास घेऊन शहराचा केलेला कायापालट, पुणे फेस्टिवल, पुणे आंतरराष्ट्रीय चित्रपट महोत्सव, शनिवारवाडा नृत्य महोत्सव आणि पुणे व्यासपीठ यांसारख्या त्यांच्या कल्पक योजनांना पुणेकरांनी यावेळी आदराने स्मरण केले.
कलमाडी हे एक उत्तम क्रीडा संघटक होते. त्यांनी पुणे शहरात सुरू केलेली मॅरेथॉन जागतिक पातळीवर नेली. पुण्यातील राष्ट्रकुल युवा क्रीडा स्पर्धेचे तसेच दिल्लीतील राष्ट्रकुल क्रीडा स्पर्धेचे त्यांनी केलेले दिमाखदार आयोजन या आठवणींना क्रीडा क्षेत्रातील मान्यवरांनी उजाळा दिला.
या श्रद्धांजली सभेत ‘रघुपती राघव राजाराम’, ‘सूर निरागस हो’, ‘शिवनंदना हे शुभनायका’ यांसारख्या भजनांनी वातावरण भक्तिमय झाले होते. सरिता कुमठेकर (गायन), सायली चितोडकर (गायन), श्लोक मोकलकर (गिटार), शिवानंद वैरागकर (तबला), ओंकार डांगमाळी (किबोर्ड) आणि अभय ओक (बासरी) यांनी यात सहभाग घेतला. विवेक भागवत यांनी संयोजक म्हणून काम पाहिले.
