पुणे शहराच्या सार्वजनिक वाहतूक व्यवस्थेचा विस्तार करण्यासाठी एप्रिल-मे २०२६ पर्यंत पीएमपीच्या ताफ्यात सुमारे २,५०० नव्या गाड्या दाखल केल्या जातील, अशी माहिती पुण्याचे खासदार आणि केंद्रीय सहकार व नागरी हवाई वाहतूक राज्यमंत्री मुरलीधर मोहोळ यांनी दिली.
.
खासदार मोहोळ शुक्रवारी पर्वती विधानसभा मतदारसंघात महापालिका निवडणुकीच्या प्रचारासाठी पदयात्रा व रॅलीद्वारे मतदारांशी संपर्क साधल्यानंतर पत्रकारांशी बोलत होते. सार्वजनिक वाहतूक व्यवस्था सक्षम करण्यावर भाजपचा भर असून, त्यासाठीच मेट्रो आणि पीएमपी या दोन्ही सेवा कार्यक्षमतेने चालवण्याचे नियोजन असल्याचे त्यांनी सांगितले. यावेळी नगर विकास राज्यमंत्री माधुरी मिसाळही पदयात्रेत सहभागी झाल्या होत्या.
विस्तारित पीएमआरडीएसह शहरातील बस मार्ग व फेऱ्यांचा फेरआढावा घेतला जाणार आहे. ताफ्यात एक हजार ई-बस आणण्याची प्रक्रिया सुरू असून, या गाड्यांना केंद्र सरकारने मंजुरी दिली आहे. सध्या ३९४ मार्गांवर सेवा देणाऱ्या पीएमपीच्या मार्गात आणखी किमान १०० नवीन मार्गांची भर पडेल. यामुळे उपनगरातील दुर्लक्षित भाग, झपाट्याने विकसित होत असलेले शहराबाहेरील परिसर तसेच औद्योगिक आणि आयटी हब्सपर्यंत सार्वजनिक वाहतूक सेवा अधिक प्रभावीपणे पोहोचेल, असे मोहोळ यांनी नमूद केले.
पर्यावरणपूरक आणि गतिमान वाहतूक व्यवस्थेला चालना देण्यासाठी पीएमपीकडून २५ इलेक्ट्रिक दुमजली (डबल-डेकर) गाड्या भाडेतत्त्वावर सुरू करण्याची प्रक्रिया अंतिम टप्प्यात आहे. त्यासाठी निविदा प्रक्रिया सुरू असून, येत्या वर्षात पुण्यातील रस्त्यांवर पुन्हा एकदा डबल-डेकर धावणार आहेत. सप्टेंबर महिन्यात हिंजवडी, भोसरी, कोरेगाव पार्क आणि विमाननगर मार्गांवर १० दिवसांची प्रायोगिक चाचणी घेण्यात आली होती. बॅटरी क्षमता, ऊर्जा कार्यक्षमता आणि शहरातील वाहतूक परिस्थितीसाठीची उपयुक्तता तपासणाऱ्या तज्ज्ञ समितीच्या सकारात्मक अहवालानंतर या गाड्यांना हिरवा कंदील मिळाल्याची माहिती मोहोळ यांनी दिली.
या प्रस्तावित डबल-डेकर बस प्रमुख मार्गांवर धावतील. यामध्ये हिंजवडी फेज ३ (वर्तुळाकार), रामवाडी मेट्रो स्थानक – खराडी, मगरपट्टा सिटी – कल्याणी नगर मेट्रो, पुणे रेल्वे स्थानक – लोहगाव विमानतळ, देहू – आळंदी आणि चिंचवड – हिंजवडी या मार्गांचा समावेश आहे.
