औंढा नागनाथ तालुक्यातील शिरडशहापूर येथील हळद व्यापाऱ्याची १४.७४ लाख रुपयांची फसवणूक करणाऱ्या गुजरात राज्यातील तीन हळद व्यापाऱ्यांवर औंढा नागनाथ पोलिस ठाण्यात रविवारी ता. ४ गुन्हा दाखल करण्यात आला आहे.
.
पोलिसांनी दिलेल्या माहितीनुसार, औंढा नागनाथ तालुक्यातील शिरडशहापूर येथील किशोर पारडे हे हळद खरेदी विक्रीचा व्यवसाय करतात. गुजरात राज्यातील तीन व्यापारी हळद खरेदीसाठी ता. १८ जुलै २०२५ रोजी शिरडशहापूर येथे आले होते. त्यांनी किशोर यांच्या दुकानावर जाऊन त्यांच्याकडून ३७,४२ लाख रुपये किंमतीची २७ टन पॉलीश हळद खरेदी केली होती. सदर हळदीच्या खरेदी पोटी तिघांनी २२.६८ लाख रुपये दिले होते. उर्वरीत १४.७४ लाख रुपये नंतर देतो असे सांगून त्यांनी वाहनात हळदीचे पोते भरून नेले.
दरम्यान, काही दिवसानंतर किशोर यांनी त्या व्यापाऱ्यांशी संपर्क साधला. यावेळी त्यांनी ता. १५ नोव्हेंबर २०२५ रोजी आणखी १८ टन हळद पाठवून देण्याबाबत कळविले. मात्र पूर्वीचे पैसे दिल्यानंतरच १८ टन हळद पाठवून दिली जाईल असे किशोर यांनी स्पष्ट केले. पण, त्यानंतर त्यांनी किशोर यांच्याशी संपर्कच केला नाही.
याप्रकरणात किशोर यांनी त्या व्यापाऱ्यांशी संपर्क साधून पैसे पाठविण्याबाबत वारंवार विनंती केली असतांनाही त्यांनी पैसे पाठवलेच नाही. त्यामुळे आपली फसवणूक झाल्याचे लक्षात येताच किशोर यांनी आज औंढा नागनाथ पोलिस ठाणे गाठून रितसर तक्रार दाखल केली. यावरून औंढा नागनाथ पोलिसांनी अंजूम सय्यद (रा. सुरत, गुजरात), मोहम्मद आसीफ अब्दूल वाहिद मलीक, अन्नवर अब्दूल वाहिद मलीक (दोघे. रा. अहमदाबाद , गुजरात) यांच्या विरुध्द गुन्हा दाखल केला आहे. पोलिस निरीक्षक जी. एस. राहिरे, उपनिरीक्षक वाघमारे, जमादार रवीकांत हरकाळ पुढील तपास करत आहेत.
