पुण्यात ‘मकोका’ कारवाईतील फरार गुन्हेगाराने लष्कर भागात आत्महत्या केली आहे. त्याने आत्महत्या करण्यापूर्वी लिहिलेल्या चिठ्ठीत (सुसाईड नोट) एका माजी नगरसेवकासह काही जणांची नावे आढळली आहेत. माजी नगरसेवकाने फरार आरोपीकडे ५० लाख रुपये मागितल्याचा आरोप आहे
.
सादिक हुसेन कपूर (वय ५६, रा. सय्यदनगर, हडपसर) असे आत्महत्या केलेल्या गुन्हेगाराचे नाव आहे. याप्रकरणी राष्ट्रवादी काँग्रेसचे माजी नगरसेवक फारुक यासीन इनामदार, अफान फारुक इनामदार, जहूर महंमद सय्यद (तिघे रा. सय्यदनगर, हडपसर) आणि तन्वीर इब्राहिम मणीयार यांच्याविरुद्ध गुन्हा दाखल करण्यात आला आहे. कपूर यांचा मुलगा साजीद (वय २७) यांनी यासंदर्भात फिर्याद दिली असल्याची माहिती लष्कर पोलीस ठाण्याचे वरिष्ठ पोलीस निरीक्षक गिरीशकुमार दिघावकर यांनी दिली.
पोलिसांनी दिलेल्या माहितीनुसार, सादिक कपूर याचे लष्कर भागातील ईस्ट स्ट्रीट परिसरातील कुमार पॅलेस सोसायटीत कार्यालय आहे. कपूर जमीन खरेदी-विक्रीचा व्यवसाय करत होता. शनिवारी सायंकाळी त्याने कार्यालयात गळफास घेऊन आत्महत्या केल्याचे उघडकीस आले. घटनेची माहिती मिळताच लष्कर पोलिसांनी घटनास्थळी भेट दिली. त्याला तातडीने ससून रुग्णालयात दाखल करण्यात आले, मात्र उपचारापूर्वीच त्याचा मृत्यू झाल्याचे डॉक्टरांनी सांगितले.
सादिक कपूर याने आत्महत्या करण्यापूर्वी ३० ते ३५ पानी चिठ्ठी लिहिली होती, जी पोलिसांनी जप्त केली आहे. सादिक कपूर यांचा मुलगा साजीद याने दिलेल्या फिर्यादीत म्हटले आहे की, ‘माजी नगरसेवकाने वडिलांकडे ५० लाख रुपये मागितले होते. नगरसेवक, त्याचा मुलगा आणि साथीदारांच्या त्रासामुळे वडिलांनी आत्महत्या केली.’ या फिर्यादीनंतर गुन्हा दाखल करण्यात आला आहे.
सय्यदनगर परिसरात टिपू पठाण याची दहशत आहे आणि त्याच्याविरुद्ध वानवडी, हडपसर पोलीस ठाण्यात गंभीर गुन्हे दाखल आहेत. सादिक कपूर हा पठाणच्या टोळीचा सदस्य होता. त्याच्याविरुद्ध ‘मकोका’ कारवाई करण्यात आल्यानंतर तो फरार झाला होता.
