अन्न व औषध प्रशासन मंत्री नरहरी झिरवाळ यांनी राज्यातील प्रतिबंधित वस्तूंच्या विरोधात कठोर पावले उचलण्याचे आदेश दिल्यानंतर विभागाने राज्यभर जोरदार मोहीम सुरू केली असून, याच धडक कारवाईअंतर्गत पुणे जिल्ह्यातील मावळमधील टाकवे येथील ‘मे. सोएक्स इंडिया प्र
.
अन्न सुरक्षा अधिकारी श्रीमती अस्मिता टोणपे यांनी दिलेल्या माहितीनुसार, ही कारवाई 2 जानेवारी 2026 रोजी करण्यात आली. यापूर्वी 1 डिसेंबर 2025 रोजी या कंपनीच्या उत्पादनांचे नमुने तपासणीसाठी घेण्यात आले होते. मुंबईतील अन्न विश्लेषकांच्या अहवालानुसार, या नमुन्यांमध्ये ‘निकोटिन’ पॉझिटिव्ह आढळले. हे उत्पादन मानवी आरोग्यास घातक असून महाराष्ट्र सरकारने 16 जुलै 2025 रोजी काढलेल्या प्रतिबंधात्मक आदेशाचे उल्लंघन करणारे असल्याचे स्पष्ट झाले.
एकूण किंमत 31 कोटी 67 लाख 21 987 रुपये (31.67 कोटी) रुपयांचे विविध फ्लेवर्सचे तयार हुक्का प्रॉडक्ट्स, कच्चे पदार्थ आणि फ्लेवर्सचा साठा जप्त करून कंपनीच्या दारांना सील ठोकले आहे. या प्रकरणी अनिल कुमार चौहान (असिस्टंट मॅनेजर), असिफ फाजलानी (संचालक), फैजल फाजलानी (संचालक), मे. सोएक्स इंडिया प्रा. ली. (कंपनी) या व्यक्तींविरुद्ध पोलिसांनी गुन्हा नोंदवला आहे. आरोपींविरुद्ध भारतीय न्याय संहिता कलम 3(5), 123, 223, 274, 275 आणि अन्न सुरक्षा व मानदे कायदा 2006 च्या विविध कलमांनुसार (कलम 30, 26, 27, 59) गुन्हा दाखल करण्यात आला आहे.
कारवाईमुळे अवैध हुक्का माफियांचे धाबे दणाणले
प्रतिबंधित सुगंधी तंबाखू आणि हुक्का माफियांच्या विरोधात अन्न व औषध प्रशासनाने (FDA) राज्यभर मोठी मोहीम उघडली असून, भिवंडीतील एका मोठ्या कारवाईचा धागा पकडून पुण्यापर्यंतची साखळी उद्ध्वस्त केली आहे. भिवंडीतील दापोडे येथील ‘मे. हायस्ट्रीट इम्पेक्स एलएलपी’ या गोदामावर 30 डिसेंबर 2025 रोजी छापा टाकून तब्बल 19 कोटी 45 लाख 76 हजार 320 रुपये किमतीचा ‘अफजल’ ब्रँडचा प्रतिबंधित हुक्का साठा जप्त करण्यात आला. या उत्पादनाच्या नमुन्यांमध्ये मानवी आरोग्यास अपायकारक असणारे निकोटिन आढळल्याचे अन्न विश्लेषकांनी घोषित केले होते. या प्रकरणाचा सखोल तपास पोलिस निरीक्षक अभिजित सुभाष देशमुख करत असून, या कारवाईमुळे अवैध हुक्का माफियांचे धाबे दणाणले आहेत.
महाराष्ट्र-मध्यप्रदेश सीमेवरही मोठी कारवाई
दुसरीकडे, जळगाव जामोद येथील महाराष्ट्र-मध्यप्रदेश सीमेवरही वनविभागाने सतर्कता दाखवत मोठी कारवाई केली आहे. सातपुडा पर्वताच्या पायथ्याशी असलेल्या तपासणी नाक्यावर मध्यप्रदेशातून महाराष्ट्रात अवैधरित्या आणला जाणारा 75 लाख रुपये किमतीचा ‘विमल’ गुटखा आणि पान मसाल्याचा साठा जप्त करण्यात आला. राज्यात मानवी आरोग्यास घातक ठरणाऱ्या सुगंधी तंबाखू आणि हुक्क्यावर बंदी असतानाही छुप्या मार्गाने होणारी ही तस्करी रोखण्यासाठी प्रशासन आता अधिक आक्रमक झाले आहे. भिवंडी, पुणे आणि जळगाव अशा विविध ठिकाणी झालेल्या या कारवायांमुळे गुटखा आणि हुक्का तस्करांचे मोठे जाळे उघडकीस आले आहे.
