दर्यापूर तालुक्यातील सामदा येथील जिल्हा परिषद पूर्व माध्यमिक मराठी शाळेत अज्ञात समाजकंटकांनी घृणास्पद कृत्य केले आहे. शाळेच्या वर्गखोल्या तसेच मुख्य दरवाजाच्या कुलपाला घाण चिकटवण्यात आली होती. ही बाब सोमवारी सकाळी शाळा उघडताना निदर्शनास आली, त्यामुळे वर्गखोल्या न उघडता विद्यार्थ्यांना शाळेच्या पटांगणात बसवून वर्ग भरवण्यात आले. सामदा येथील या शाळेत पहिली ते सातवीपर्यंतचे १२२ विद्यार्थी शिक्षण घेतात. सोमवारी सकाळी वर्गात सर्वत्र दुर्गंधी आणि अस्वच्छता असल्याने विद्यार्थ्यांना वर्गखोलीत बसवणे शक्य झाले नाही. शिक्षकांनी अखेर पटांगणातच अध्यापन केले. हे कृत्य कोणी आणि कोणत्या उद्देशाने केले, याबाबत अद्याप माहिती मिळालेली नाही. दरम्यान, शाळा प्रशासनाने तात्काळ स्वच्छता करून घेतली आहे. या घटनेची गंभीर दखल घेत सामाजिक कार्यकर्ते प्रभाकर चोरपगार यांनी चौकशीची मागणी केली आहे. त्यांनी म्हटले आहे की, चिमुकल्यांच्या शाळेत असे कृत्य करणे अत्यंत निंदनीय आहे. पोलिसांनी तात्काळ तपास करून आरोपींना पकडावे, अशी मागणी त्यांनी केली. शिक्षण विभाग आणि पोलीस प्रशासनाने या प्रकरणाचा तपास सुरू केला आहे. या घटनेबाबत दर्यापूर पंचायत समितीचे प्रभारी गटशिक्षण अधिकारी नंदकुमार जाधव यांनी प्रतिक्रिया दिली. ते म्हणाले, “सामदा येथील घटनेची प्राथमिक माहिती मिळाली आहे. विद्येच्या मंदिरात घडलेली ही घटना अत्यंत दुर्दैवी आहे. केंद्रप्रमुखांकडून सखोल अहवाल प्राप्त झाल्यानंतर पुढील कारवाई करण्यात येईल.”
