पुणे शहरात सायबर चोरट्यांनी विमा पाॅलिसीच्या नावाखाली नागरिकांना लाखो रुपयांचा गंडा घातल्याचे दोन प्रकार उघडकीस आले आहेत. यात एका प्रकरणात ४० लाख रुपयांची, तर दुसऱ्या प्रकरणात ११ लाख रुपयांची फसवणूक झाली आहे. दोन्ही घटनांमध्ये सायबर चोरट्यांविरुद्ध संबंधित पोलीस ठाण्यांमध्ये गुन्हे दाखल करण्यात आले आहेत. पहिल्या घटनेत, वाघोली येथे राहणाऱ्या एका ४५ वर्षीय व्यक्तीची ४० लाख रुपयांची फसवणूक झाली आहे. तक्रारदार व्यक्तीने एका खासगी कंपनीच्या आयुर्विमा पाॅलिसीमध्ये गुंतवणूक केली होती. सायबर चोरट्याने त्यांच्याशी संपर्क साधून पाॅलिसीची मुदत संपल्याचे आणि विमा कंपनीकडून रक्कम परत मिळणार असल्याचे सांगितले. चोरट्याने नाहरकत प्रमाणपत्र (NOC) आणि इतर करांच्या नावाखाली वेळोवेळी पैसे मागितले. तक्रारदाराने चोरट्याच्या बँक खात्यात एकूण ४० लाख रुपये जमा केले. मात्र, त्यानंतर त्यांना पाॅलिसीची रक्कम परत मिळाली नाही. चौकशीअंती आपली फसवणूक झाल्याचे त्यांच्या लक्षात आले. या प्रकरणी वाघोली पोलीस ठाण्यात सायबर चोरट्याविरुद्ध गुन्हा दाखल करण्यात आला आहे. गुन्हे शाखेच्या पोलीस निरीक्षक पल्लवी मेहेर या प्रकरणाचा पुढील तपास करत आहेत. दुसऱ्या घटनेत, हडपसर येथील एका तरुणाची बंद पडलेली विमा पाॅलिसी सुरू करून देण्याच्या आमिषाने ११ लाख रुपयांची फसवणूक करण्यात आली आहे. सायबर चोरट्याने तक्रारदार तरुणाच्या मोबाईल क्रमांकावर संपर्क साधून बंद पडलेली पाॅलिसी सुरू केल्यास २५ लाख ९२ हजार रुपये परत मिळवून देण्याचे आमिष दाखवले. या आमिषाला बळी पडून तरुणाने चोरट्याच्या बँक खात्यात वेळोवेळी १० लाख ८६ हजार रुपये जमा केले. फसवणूक झाल्याचे लक्षात आल्यानंतर त्याने पोलिसांत धाव घेतली. या प्रकरणी काळेपडळ पोलीस ठाण्यात सायबर चोरट्याविरुद्ध गुन्हा दाखल करण्यात आला आहे. गुन्हे शाखेचे पोलीस निरीक्षक अण्णासाहेब बाबर या प्रकरणाचा तपास करत आहेत.
