नांदेड परिक्षेत्रात अवैध व्यवसायविरोधी धडक कारवाई 15,840 गुन्हे दाखल, ₹109.72 कोटींचा मुद्देमाल जप्त
नांदेड (प्रतिनिधी):
नांदेड पोलीस परिक्षेत्रांतर्गत नांदेड, परभणी, हिंगोली व लातूर या चार जिल्ह्यांमध्ये 1 मे 2025 पासून राबविण्यात आलेल्या अवैध व्यवसायविरोधी विशेष अभियानात मोठी कारवाई करण्यात आली आहे. या कालावधीत एकूण 15,840 गुन्हे दाखल करण्यात आले असून ₹109 कोटी 72 लाख 45 हजार 163 रुपयांचा मुद्देमाल जप्त करण्यात आला आहे. या कारवाईत 17,783 आरोपींवर कायदेशीर कारवाई करण्यात आली आहे.
पोलीस उपमहानिरीक्षक कार्यालय, नांदेड यांनी दिलेल्या माहितीनुसार या अभियानाअंतर्गत अवैध दारू, मटका, जुगार, लॉटरी, अंमलीपदार्थ, वेश्या व्यवसाय, अवैध वाळू वाहतूक यांसारख्या विविध बेकायदेशीर व्यवसायांविरोधात कठोर कारवाई करण्यात आली.
जिल्हानिहाय कारवाईचा तपशील पुढीलप्रमाणे—
नांदेड: 4,320 गुन्हे | ₹53.68 कोटी मुद्देमाल | 5,353 आरोपी
परभणी: 3,744 गुन्हे | ₹19.22 कोटी मुद्देमाल | 4,126 आरोपी
लातूर: 4,166 गुन्हे | ₹17.88 कोटी मुद्देमाल | 4,654 आरोपी
हिंगोली: 3,610 गुन्हे | ₹18.92 कोटी मुद्देमाल | 3,650 आरोपी
या कारवाईदरम्यान नांदेड जिल्ह्यात गांजा तर लातूर जिल्ह्यात एम.डी. ड्रग्स जप्त करण्यात आले असून त्यांची एकूण किंमत सुमारे ₹22 लाख आहे. तसेच 123 व्यक्तींना हद्दपार करण्यात आले असून 6 जणांविरुद्ध एमपीडीए अंतर्गत स्थानबद्धतेची कारवाई करण्यात आली आहे.
दरम्यान, अवैध व्यवसायांची माहिती थेट पोलिसांपर्यंत पोहोचवण्यासाठी पोलीस उपमहानिरीक्षक शहाजी उमाप यांनी “खबर” नावाची विशेष हेल्पलाईन सुरू केली आहे. नागरिकांनी अवैध व्यवसायांविषयी माहिती देण्यासाठी व्हॉट्सअॅप क्रमांक 9150100100 वर संपर्क साधावा, असे आवाहन त्यांनी केले आहे. तसेच संबंधित संकेतस्थळावरूनही नागरिकांनी माहिती द्यावी, असे आवाहन करण्यात आले आहे.
अवैध व्यवसायांविरोधातील ही धडक मोहीम पुढेही अधिक तीव्र करण्यात येणार असल्याचे पोलिसांकडून स्पष्ट करण्यात आले आहे.
वार्ताहार/प्रतिनिधी
