अमरावती विद्यापीठात समता पॅनलचा एकतर्फी विजय:अजय देशमुख पुन्हा अध्यक्ष; सर्व 13 जागा जिंकल्या

संत गाडगेबाबा अमरावती विद्यापीठाच्या शिक्षकेतर कर्मचारी संघाच्या बहुप्रतिक्षित निवडणुकीत ‘समता पॅनल’ने पुन्हा एकदा बाजी मारली आहे. अजय देशमुख यांच्या नेतृत्वाखालील या पॅनलने सर्व १३ जागांवर एकतर्फी विजय मिळवत इतिहास रचला. या निवडणुकीत अजय देशमुख यांची पुन्हा अध्यक्षपदी, तर नरेंद्र घाटोळ यांची महासचिवपदी मोठ्या मताधिक्याने निवड झाली. एकूण २३७ कर्मचाऱ्यांपैकी २३१ कर्मचाऱ्यांनी (९७.४६ टक्के) मतदानाचा हक्क बजावला. विजयी उमेदवारांमध्ये अध्यक्ष व महासचिव यांच्याशिवाय उपाध्यक्ष प्रेम मंडपे (तृतीय श्रेणी) व पंकज ठाकूर (चतुर्थ श्रेणी), सहसचिव विजय चवरे व शशिभूषण हुसे, कोषाध्यक्ष योगेश कांत यांचा समावेश आहे. कार्यकारिणी सदस्य म्हणून मयूर बोरकर, मंगेश रोंघे, निलेश वंदे, निनाद देशपांडे, सतीश लोखंडे आणि किरण नांदाणे यांची निवड झाली. निकाल जाहीर होताच समता पॅनलच्या कार्यकर्त्यांनी फटाक्यांची आतषबाजी करत आणि ढोल-ताशांच्या गजरात विजयाचा गुलाल उधळला. विजयी उमेदवारांची विद्यापीठ परिसरातून वाजत-गाजत विजय रॅली काढण्यात आली, ज्याचा समारोप संत गाडगे बाबांच्या पुतळ्याला पुष्पहार अर्पण करून करण्यात आला. या ऐतिहासिक विजयाबद्दल कुलगुरू डॉ. मिलिंद बारहाते, प्र-कुलगुरू डॉ. महेंद्र ढोरे, कुलसचिव डॉ. अविनाश असनारे, महाराष्ट्र विद्यापीठ मागासवर्गीय कर्मचारी संघटनेचे अध्यक्ष डॉ. नितीन कोळी, वित्त व लेखाधिकारी सी.ए. पुष्कर देशपांडे, उपकुलसचिव मंगेश वरखेडे, डॉ. दादाराव चव्हाण यांच्यासह राज्यातील विविध कर्मचारी संघटनांनी नवनियुक्त कार्यकारिणीचे अभिनंदन केले आहे. या निवडणुकीसाठी ऋतुराज देशमुख यांनी निवडणूक निर्णय अधिकारी म्हणून काम पाहिले, तर संजय खोब्रागडे, मोहन इंगळे, श्रीकांत मोहदरकर यांनी सहायक निवडणूक अधिकारी म्हणून सहकार्य केले. रवींद्र सयाम यांनी मतदान अधिकारी आणि अनिल मेश्राम यांनी मतमोजणी अधिकारी म्हणून आपली जबाबदारी चोख पार पाडली.