मंगळवारची कॅबिनेट बैठक रद्द:सुनेत्रा पवार उपमुख्यमंत्री म्हणून मंत्रालयात कधी जाणार? तारीख ठरली

राज्याचे माजी उपमुख्यमंत्री अजित पवार यांच्या अकाली निधनामुळे निर्माण झालेली राजकीय पोकळी आणि आगामी स्थानिक स्वराज्य संस्थांच्या निवडणुकांवरील त्याचे संभाव्य परिणाम चर्चेत असतानाच, पवार कुटुंब या दु:खातून सावरून नवी राजकीय जबाबदारी पेलताना दिसत आहे. नवनियुक्त उपमुख्यमंत्री सुनेत्रा पवार यांनी आपल्या पदाची शपथ आता मंत्रालयात कधी जाणार याकडे सर्वांचे लक्ष लागले आहे. परंतु मंगळवारची मंत्रिमंडळाची बैठक पुढे ढकलण्यात आली आहे. त्यामुळे सुनेत्रा पवार उपमुख्यमंत्री म्हणून मंत्रालयात आता 9 फेब्रुवारी रोजी जाणार असल्याची माहिती समोर आली आहे. अजित पवार यांच्या दुःखद निधनानंतर संपूर्ण महाराष्ट्र अजूनही शोकाकुल असून, त्यांच्या अस्थिकलशाचे दर्शन घेण्यासाठी ठिकठिकाणी जनसागर लोटत आहे. बारामतीमध्ये अंत्यसंस्कार पार पडल्यानंतर त्यांचे अस्थिकलश राज्यभरातील विविध जिल्ह्यांमध्ये कार्यकर्त्यांच्या दर्शनासाठी पाठवण्यात आले आहेत. आज अनेक जिल्ह्यांत हे कलश पोहोचले असता राष्ट्रवादी काँग्रेसच्या कार्यकर्त्यांनी आणि सर्वसामान्य जनतेने आपल्या लाडक्या नेत्याला अत्यंत भावूक वातावरणात श्रद्धांजली वाहिली. अनेक ठिकाणी कार्यकर्त्यांना अश्रू अनावर झाल्याचे हृदयद्रावक दृश्य पाहायला मिळाले. दुसरीकडे, बारामती येथील निवासस्थानी पवार कुटुंबीयांचे सांत्वन करण्यासाठी राज्यभरातून मोठ्या संख्येने कार्यकर्ते आणि पदाधिकारी येत आहेत. या पार्श्वभूमीवर उपमुख्यमंत्री सुनेत्रा पवार सध्या बारामतीतच असून त्या सांत्वनासाठी येणाऱ्यांच्या गाठीभेटी घेत आहेत. दरम्यान, या दुःखद प्रसंगामुळे उद्या मंत्रालयात होणारी मंत्रिमंडळ बैठक पुढे ढकलण्याचा निर्णय प्रशासनाकडून घेण्यात आला आहे. त्यामुळे या आठवड्यात कोणतीही कॅबिनेट बैठक होणार नसून, प्रशासकीय आणि राजकीय वर्तुळ सध्या या मोठ्या धक्क्यातून सावरताना दिसत आहे. 9 फेब्रुवारीला सुनेत्रा पवार मंत्रालयात जाणार राज्य मंत्रिमंडळाची नियमित मंगळवारी होणारी बैठक उद्या रद्द करण्यात आली असून, अजित पवारांचे दुःखद निधन आणि राज्यातील जिल्हा परिषद निवडणुकांची धामधूम यामुळे हा निर्णय घेण्यात आला आहे. या निर्णयामुळे नवनियुक्त उपमुख्यमंत्री सुनेत्रा पवार उद्याच्या बैठकीला उपस्थित राहणार का, या चर्चांना आता पूर्णविराम मिळाला आहे. मिळालेल्या माहितीनुसार, सुनेत्रा पवार पुढील दोन दिवस पुणे जिल्ह्याच्या दौऱ्यावर असणार असून 9 फेब्रुवारी रोजी त्या मंत्रालयात उपस्थित होऊन आपला पदभार स्वीकारतील. दरम्यान, आपल्या लाडक्या नेत्याच्या निधनाने व्यथित झालेले कार्यकर्ते आणि नागरिक आजही मोठ्या संख्येने बारामतीत पवार कुटुंबाचे सांत्वन करण्यासाठी गर्दी करत आहेत.