पुण्यातील केईएम रुग्णालयातील डॉक्टरांनी बिबट्याच्या हल्ल्यात गंभीर जखमी झालेल्या आठ वर्षीय मुलावर यशस्वी कॅरोटिड स्टेंटिंग शस्त्रक्रिया केली. डॉ. आनंद आलुरकर यांच्या नेतृत्वाखालील पथकाने ही गुंतागुंतीची प्रक्रिया पार पाडली. या शस्त्रक्रियेमुळे मुलाच्
.
ही घटना अहमदनगर जिल्ह्यातील एका गावात डिसेंबर महिन्यात घडली. एका बिबट्याने अचानक आठ वर्षांच्या मुलावर हल्ला करून त्याला मानेला पकडून उचलले. मुलाच्या वडिलांनी दुचाकीवरून बिबट्याचा पाठलाग करत सतत हॉर्न वाजवला. त्यामुळे बिबट्याने मुलाला सोडून दिले आणि तो पळून गेला. त्यानंतर कुटुंबीयांनी मुलाला तातडीने स्थानिक रुग्णालयात दाखल केले, जिथे त्याला प्राथमिक उपचार मिळाले. पुढील उपचारांसाठी त्याला पुण्यातील केईएम रुग्णालयात आणण्यात आले.
केईएम रुग्णालयातील इंटरव्हेंशनल न्यूरोलॉजिस्ट डॉ. आनंद आलुरकर यांनी सांगितले की, बिबट्याच्या हल्ल्यामुळे मुलाच्या मानेला गंभीर दुखापत झाली होती. मेंदूला रक्तपुरवठा करणाऱ्या धमनीला फाटल्यामुळे तिथे फुगवटा (स्यूडो ॲन्युरिझम) तयार झाला होता. या स्थितीत धमनीची भिंत कमकुवत होऊन ती फाटण्याचा आणि जीवघेणा रक्तस्त्राव होण्याचा धोका असतो.
या स्थितीचे निदान डिजिटल सब्ट्रॅक्शन अँजिओग्राफी (DSA) या प्रगत तपासणीद्वारे करण्यात आले. ही तपासणी कॅथलॅबमध्ये मेंदूच्या रक्तवाहिन्यांची अँजिओग्राफी करण्यासाठी वापरली जाते.
डॉक्टरांनी कॅरोटिड स्टेंटिंग करण्याचा निर्णय घेतला. ही मेंदूच्या रक्तवाहिन्यांच्या आजारांवर उपचार करण्यासाठी केली जाणारी बिनटाक्याची शस्त्रक्रिया आहे. ही प्रक्रिया जांघेतील धमनीतून केली जाते. स्टेंटिंगसाठी ‘कव्हर्ड स्टेंट ग्राफ्ट’ वापरून धमनीतील छिद्र बंद करण्यात आले. शस्त्रक्रियेनंतर दोन दिवसांतच मुलाला रुग्णालयातून डिस्चार्ज देण्यात आला.
डॉ. आलुरकर यांनी नमूद केले की, केईएम रुग्णालयात गेल्या दोन दशकांपासून स्ट्रोक आलेल्या प्रौढ रुग्णांमधील ग्रीवा धमनीतील (कॅरोटिड आर्टरी) अडथळा दूर करण्यासाठी कॅरोटिड स्टेंटिंग प्रक्रिया वापरली जाते. मात्र, या रुग्णाचे लहान वय, मानेतील दुखापत आणि त्याला कारणीभूत परिस्थिती यामुळे वैद्यकीयदृष्ट्या हे एक दुर्मिळ आणि महत्त्वाचे यश आहे.
