महापालिका निवडणुकीचा प्रचार मंगळवार, १३ रोजी सायंकाळी थंडावला. प्रचाराच्या अखेरच्या दिवशी नागपुरात मुख्यमंत्री देवेंद्र फडणवीस यांच्या नेतृत्वात भव्य रोड-शो आणि बाईक रॅली काढण्यात आली. याव्यतिरिक्त, विविध सभा आणि महिला मेळाव्यांनीही मंगळवारचा दिवस प्
.
मुख्यमंत्र्यांच्या रोड-शोला भारतमाता चौकातून सुरुवात झाली. हा रोड-शो तीन नळ चौक, शहीद चौक, टांगा स्टॅण्ड चौक, गांधी पुतळा, बडकस चौक आणि महाल चौकातून फिरून गांधी गेट महाल येथील छत्रपती शिवाजी महाराज पुतळ्याजवळ समारोप झाला. या निमित्ताने मुख्यमंत्र्यांनी बऱ्याच वर्षांनी बुलेट चालवली.
मुख्यमंत्र्यांच्या रोड-शोचा संपूर्ण मार्ग भगव्या पताका, तोरणे आणि रंगीत फुग्यांनी सजवण्यात आला होता. शंखनादासह ठिकठिकाणी मुख्यमंत्र्यांवर पुष्पवृष्टी करण्यात आली. यावेळी बोलताना फडणवीस यांनी मतदारांना उमेदवार न पाहता कमळाला मतदान करण्याचे आवाहन केले. जनतेच्या मनात महायुती असून, ती सर्व २९ महापालिकांमध्ये प्रचंड मतांनी निवडून येईल, असा विश्वास त्यांनी व्यक्त केला.
भाजपच्या नगरसेवकांनीही त्यांच्या प्रभागात रॅली आणि रोड-शोद्वारे मतदारांशी थेट संवाद साधला. शहरातील प्रमुख भागांत पोस्टर, बॅनर आणि सामाजिक माध्यमांवर प्रचाराची जोरदार मोहीम राबवण्यात आली. भाजपचे नितीन गडकरी आणि चंद्रशेखर बावनकुळे यांच्यासह इतर उमेदवारांनीही प्रचार सभांवर भर दिला.
मंगळवारी सायंकाळी साडेपाच वाजता प्रचाराच्या तोफा थंडावणार असल्याने, सर्वपक्षीय उमेदवारांनी दुपारपर्यंत सभा आणि बैठका आयोजित केल्या होत्या. पदयात्रा, रॅली आणि प्रचार सभांमुळे निवडणुकीचा प्रचार शिगेला पोहोचला होता.
