पुणे महापालिका निवडणुकीचे वातावरण तापलेले असतानाच राष्ट्रवादी काँग्रेस (अजित पवार गट) चे उमेदवार फारुख इनामदार अडचणीत आले आहेत. प्रभाग ४१ मधील रहिवासी सादिक कपूर यांना आत्महत्येस प्रवृत्त केल्याप्रकरणी फारुक इनामदार यांच्यासह चार जणांविरुद्ध पोलिसांन
.
सादिक कपूर यांनी आत्महत्या करण्यापूर्वी सविस्तर सुसाईड नोट लिहिली होती, ज्यामध्ये फारुख इनामदार यांच्या नावाचा स्पष्ट उल्लेख आहे. विशेष म्हणजे, मृत सादिक यांच्या हातावरही फारुख इनामदार यांचे नाव लिहिलेले आढळले आहे. सादिक यांच्या मुलाने दिलेल्या फिर्यादीवरून लष्कर पोलिसांनी ही कारवाई केली आहे. या घटनेमुळे पुण्यातील राजकीय वातावरण चांगलेच तापले असून, ऐन निवडणुकीच्या तोंडावर आपल्या उमेदवारावर गुन्हा दाखल झाल्याने राष्ट्रवादी काँग्रेससमोर पेच निर्माण झाला आहे.
५० लाखांची खंडणी आणि धमकी
पोलिस उपायुक्त राजलक्ष्मी शिवणकर यांनी दिलेल्या माहितीनुसार, फारुख इनामदार यांनी सादिक कपूर यांच्याकडे ५० लाख रुपयांची खंडणी मागितली होती. जागेच्या व्यवहारातून हा वाद सुरू होता आणि इनामदार यांनी सादिक यांना धमकावण्याचा प्रयत्न देखील केला होता, असा आरोप फिर्यादीत करण्यात आला आहे. याप्रकरणी आता संबंधितांना चौकशीसाठी बोलावले जाणार आहे.
सुसाईड नोटमध्ये ३८ लोकांची नावे
सादिक कपूर यांनी आत्महत्येपूर्वी लिहिलेली सुसाईड नोट अत्यंत महत्त्वाची ठरली असून त्यात तब्बल ३८ लोकांच्या नावांचा समावेश आहे. पोलिस या सर्व ३८ लोकांच्या भूमिकेची चौकशी करणार असून, ज्यांचा रोल निष्पन्न होईल त्यांच्यावर कारवाई केली जाईल, असे उपायुक्त शिवणकर यांनी स्पष्ट केले आहे. सध्यातरी ४ मुख्य आरोपींविरोधात बीएनएस १०८, ३/५ अन्वये गुन्हा दाखल झाला आहे.
मृत सादिक कपूर ‘मोक्का’मधील आरोपी
या प्रकरणाला दुसरी बाजू देखील आहे. मृत सादिक कपूर हे स्वतः ‘मोक्का’ अंतर्गत असलेल्या दोन गुन्ह्यांत आरोपी होते आणि पोलिस रेकॉर्डवर फरार होते. १८ तारखेला त्यांचा जामीन अर्ज न्यायालयाने फेटाळला होता, अशी माहितीही पोलिसांनी दिली आहे.
कोण आहेत फारुख शेख?
आत्महत्या केलेल्या सादिक कपूर यानी आत्महत्या करताना फारुख शेख यांचे नाव हातावर लिहिले आहे. फारुख शेख हे प्रभाग ३५ मधून अजित पवार गटाचे उमेदवार आहे. माजी नगरसेवक आणि उद्योगपती फारुख शेख हे बिल्डर कॉन्ट्रक्ट घेतात. फारुख शेख गुन्हेगारी पार्श्वभूमीचा असून, शेतकरी देखील आहे. विविध देशातील आंब्यांवर प्रयोग करुन ते भारतात पिकवतात, असा दावा करतात. जपानचा आंबा पिकवतो म्हणून ते प्रसिद्धीच्या झोतात आले. कोंढवा पोलीस ठाण्यात त्यांच्यावर कोट्यवधी रुपयांच्या गैरव्यवहार प्रकरणी गुन्हा दाखल आहे. सोबतच विविध लहान मोठे गुन्हे दाखल आहेत. मोक्का अंतर्गत कारवाईदेखील त्याच्यांवर झाली आहे.
