खासदार सुप्रिया सुळे यांनी पुणे आणि पिंपरी चिंचवड महानगरपालिका निवडणुकांचे नेतृत्व आपण करणार असल्याचे जाहीर केले आहे. पत्रकार परिषदेत बोलताना त्यांनी ही माहिती दिली.
.
यावेळी त्यांनी माजी महापौर प्रशांत जगताप यांच्या भूमिकेवरही भाष्य केले. सुळे म्हणाल्या की, त्यांनी प्रशांत जगताप यांच्याशी सहा तास चर्चा केली आहे. कार्यकर्त्यांना न्याय मिळावा आणि त्यांच्या मागण्या पूर्ण व्हाव्यात अशी त्यांची अपेक्षा आहे.
जगताप यांचा राजीनामा आपल्याकडे आलेला नाही आणि ते टोकाची भूमिका का घेत आहेत, हे माहिती नसल्याचे सुळे यांनी सांगितले. केवळ प्रशांत जगतापच वेगळी भूमिका मांडत असून, पक्षातील इतर कोणीही काही बोलत नसल्याचे त्यांनी स्पष्ट केले.
पक्षात नाराजी नसते, हा शब्द घरी वापरण्याचा असतो, असे सांगत त्यांनी व्यावसायिक दृष्टिकोन महत्त्वाचा असल्याचे म्हटले. शरद पवार हे पक्षाचे केंद्रबिंदू असून, ते सांगतील तीच पूर्व दिशा असते, असेही त्यांनी नमूद केले.
आज त्यांनी पक्षाच्या शहरातील पदाधिकाऱ्यांशी वैयक्तिकरित्या चर्चा केली. या बैठकीत त्यांनी आगामी निवडणुकीच्या तयारीबाबत मते जाणून घेतली.
कार्यकर्त्यांनी एकमुखी निर्णय घेण्याचे आवाहन केले असून, पुणे शहराच्या हितासाठी पाण्याचा प्रश्न, वाहतूक समस्या, पर्यावरण आणि वायू प्रदूषण यांसारख्या मुद्द्यांवर अनेक इच्छुक उमेदवारांनी भूमिका मांडल्याचे सुळे यांनी सांगितले.
राजकारण हे लोकांची सेवा करण्याचे साधन आहे. आपण पक्षाच्या कार्यकर्त्या असून, शरद पवार जे सांगतील ते करणार असल्याचे त्यांनी सांगितले. प्रसंगी नदीत उडी मारण्यास सांगितले आणि ती भूमिका योग्य असेल तर तेही करेन, असे त्यांनी म्हटले.
मुंबईत उद्धव ठाकरे आणि राज ठाकरे निवडणुकीसाठी एकत्र आल्याबद्दल त्यांनी आनंद व्यक्त केला. तसेच, माजी महापौर दत्ता धनकावडे यांनी ‘घड्याळ’ चिन्हावर दोन्ही पक्षातील उमेदवार लढतील असे म्हटले असले तरी ते महत्त्वाचे नसल्याचे सुळे यांनी नमूद केले.
लोकसभा निवडणुकीत अनेकांनी आपल्या विरोधात काम केले असले तरी, मैत्री आणि राजकारण आपण वेगळे समजतो, असेही त्यांनी स्पष्ट केले.
