मोर्शी-अमरावती महामार्गावर सावरखेड ते गोराळा दरम्यान एका एसटी बसच्या धडकेत एका मजुराचा जागीच मृत्यू झाला. मोनू उईके (वय ४५, रा. पिंपरीढाणा, ता. भैसदेही, जि. बैतुल, मध्यप्रदेश) असे मृत मजुराचे नाव आहे. या घटनेनंतर बसचालक विशाल अमझरे याने अपघातग्रस्त बस शिरखेड पोलीस ठाण्यात जमा केली. पोलिसांनी दिलेल्या माहितीनुसार, मोर्शी तालुक्यातील सावरखेड येथील मोर्शी-अमरावती महामार्गावरील पेट्रोल पंपाजवळ थ्रेशर मशीनवर काम करणारे काही मजूर ट्रॅक्टरमध्ये डिझेल भरण्यासाठी थांबले होते. मोनू उईके हा त्या वेळी मुख्य रस्त्यावर उभा होता. अमरावतीहून मोर्शीकडे जाणाऱ्या एका एसटी बसने त्याला धडक दिली. या धडकेत मोनू उईके याचा घटनास्थळीच मृत्यू झाला. त्याला तात्काळ मोर्शी येथील उपजिल्हा रुग्णालयात नेण्यात आले, परंतु डॉक्टरांनी त्याला मृत घोषित केले. या घटनेनंतर बसचालक विशाल अमझरे याने स्वतः अपघातग्रस्त बस शिरखेड पोलीस ठाण्यात जमा केली. शिरखेड पोलीस या प्रकरणाचा पुढील तपास करत आहेत.
मोर्शी-अमरावती महामार्गावर बसच्या धडकेत मजूर ठार:बसचालकाने एसटी बस शिरखेड पोलीस ठाण्यात जमा केली; तपास सुरू
