राजनापूर्णा येथे अवैध वाळू वाहतूक:महसूल विभागाच्या पथकाची कारवाई

राजनापूर्णा परिसरात अवैध वाळू वाहतुकीवर महसूल विभागाने कारवाई करत ट्रॅक्टर जप्त केल्याची घटना शनिवारी ७ फेब्रुवारीला सकाळी सुमारे आठ वाजण्याच्या सुमारास घडली. ही कार्यवाही प्रभारी तहसीलदार मनोज सोनारकर यांच्या मार्गदर्शना खालील पथकाने ही कारवाई केली. राजना पूर्णा परिसरातून अवैध रीत्या वाळूची वाहतूक होत असल्याची गुप्त माहिती महसूल विभागाला प्राप्त झाली होती. या माहितीच्या आधारे तहसीलदार मनोज सोनारकर यांच्या नेतृत्वाखाली महसूल पथकाने सकाळी सापळा रचून पाहणी केली. दरम्यान ट्रॅक्टर क्रमांक एम एच २७ बी झेड ६६८७ हे वाहन वाळू वाहतूक करताना आढळून आले. वाहनात वाळूचा साठा असल्याचे स्पष्ट दिसून आल्याने संबंधित वाहन ताब्यात घेण्यात आले. महसूल पथकाने तत्काळ वाहन थांबवून चौकशी केली असता वाहनाकडे वाळू वाहतुकीसाठी आवश्यक असलेले अधिकृत परवाने किंवा कागदपत्रे नसल्याचे आढळून आले. पुढील कार्यवाहीसाठी वाहन पोलीस स्टेशन आसेगाव येथे नेण्यात आले. पोलीस स्टेशन आसेगाव येथे वाहनाचा जप्तीनामा व पंचनामा करण्यात आला. पंचनामा प्रक्रिया पूर्ण केल्यानंतर वाहन सुपुर्तनाम्यावर जमा करण्यात आले आहे. या कारवाईमध्ये ग्राम महसूल अधिकारी मोहन पाखरे, विपुल ठाकरे, दीक्षा बेठेकर तसेच महसूल सेवक आशिष वैराळे आणि प्रमोद इंगळे यांचा सहभाग आहे. पथकाच्या तत्परतेमुळे अवैध रेती वाहतुकीचा प्रकार उघडकीस आला असून परिसरात अशा प्रकारच्या बेकायदेशीर हालचालींवर आळा बसणार असल्याची अपेक्षा व्यक्त करण्यात येत आहे.