पुणे शहरात तीन वेगवेगळ्या अपघातांमध्ये दोन महिलांसह तिघांचा मृत्यू झाला आहे. उत्तमनगर, औंध आणि नगर रस्ता परिसरात या घटना घडल्या. पोलिसांनी संबंधित चालकांविरोधात गुन्हे दाखल केले आहेत. उत्तमनगर येथील एनडीए रस्त्यावर दुचाकी घसरल्याने शर्ली एन. ॲंथोनी (वय ३७, रा. उत्तमनगर) या सहप्रवासी महिलेचा मृत्यू झाला. ही घटना २ जानेवारी रोजी दुपारी पावणेतीनच्या सुमारास भाजी मंडई परिसरात घडली. भरधाव दुचाकी घसरल्याने शर्ली यांच्या डोक्याला गंभीर दुखापत झाली आणि उपचारादरम्यान त्यांचा मृत्यू झाला. या प्रकरणी पोलीस कर्मचारी सचिन गायकवाड यांनी उत्तमनगर पोलीस ठाण्यात फिर्याद दिली आहे. पोलिसांनी शर्ली यांच्या पतीवर, भरधाव दुचाकी चालवून पत्नीच्या मृत्यूस जबाबदार ठरल्याप्रकरणी गुन्हा दाखल केला आहे. पोलीस उपनिरीक्षक चेतन धनवडे या प्रकरणाचा तपास करत आहेत. औंध रस्त्यावर पीएमपी बसच्या धडकेत चंद्रकला ज्ञानोबा वाव्हाळ (वय ७५, रा. औंध) या पादचारी ज्येष्ठ महिलेचा मृत्यू झाला. ३० जानेवारी रोजी रात्री सव्वानऊच्या सुमारास चंद्रकला वाव्हाळ गणेशखिंड रस्त्याने जात असताना, औंध येथील केंद्रीय विद्यालयासमोर रस्ता ओलांडत होत्या. त्याचवेळी भरधाव पीएमपी बसने त्यांना धडक दिली, यात त्यांचा मृत्यू झाला. प्रभावती भोसले (वय ७४, रा. औंध) यांनी चतु:शृंगी पोलीस ठाण्यात या प्रकरणी फिर्याद दिली आहे. पोलिसांनी पीएमपी बस चालकाविरुद्ध गुन्हा दाखल केला असून, पोलीस उपनिरीक्षक मनीषा जाधव पुढील तपास करत आहेत. नगर रस्ता भागात पीएमपी बसमध्ये प्रवेश करत असताना पाठीमागून आलेल्या ट्रकच्या धडकेत रणजीत प्रकाश भोसले (वय ५१, रा. वडगाव शेरी) या प्रवाशाचा मृत्यू झाला. ही घटना शनिवारी मध्यरात्री नगर रस्त्यावरील पीएमपी थांब्यावर घडली. प्रवेश यादव (वय ३२, रा. सोमनाथनगर, वडगाव शेरी) यांनी चंदननगर पोलीस ठाण्यात याबाबत फिर्याद दिली आहे. भरधाव ट्रकने धडक दिल्याने भोसले यांचा मृत्यू झाला. पोलीस उपनिरीक्षक नवनाथ क्षीरसागर या प्रकरणाचा तपास करत आहेत.
पुणे शहरात तीन वेगवेगळ्या अपघातात तिघांचा मृत्यू:मृतांमध्ये दोन महिलांचा समावेश; उत्तमनगर, औंध, नगर रस्त्यावर घटना
