टेंब्रुसोंडा-परसापुर रस्त्यासाठी आदिवासींचे धरणे आंदोलन:अचलपूर एसडीओ कार्यालयासमोर ठिय्या, बैठक रद्द झाल्याने संताप

मेळघाटातील आदिवासींनी टेंब्रुसोंडा ते परसापूर रस्त्यासह इतर समस्यांसाठी अचलपूर येथील उपविभागीय अधिकारी (SDO) कार्यालयासमोर धरणे आंदोलन केले. नियोजित बैठक रद्द झाल्याने आणि निवेदन स्वीकारले न गेल्याने संतप्त आदिवासींनी हा ठिय्या दिला. यापूर्वी, १ जानेवारी रोजी मेळघाटातील आदिवासींनी टेंब्रुसोंडा येथून अमरावतीकडे पदयात्रा काढली होती. ही पदयात्रा अचलपूरला पोहोचल्यावर जिल्हाधिकाऱ्यांनी हस्तक्षेप करत प्रशासनाला त्यांच्याशी चर्चा करण्याचे आदेश दिले होते. त्यानुसार, उपविभागीय अधिकाऱ्यांनी (SDO) आदिवासींना २८ जानेवारी रोजी चर्चेसाठी बोलावले होते. मात्र, ऐनवेळी ही बैठक रद्द करण्यात आली. तोपर्यंत आदिवासी अचलपूरला पोहोचले होते. आदिवासी नेत्यांनुसार, बैठक रद्द झाल्याची किंवा पुढे ढकलल्याची कोणतीही पूर्वकल्पना त्यांना देण्यात आली नव्हती. त्यामुळे स्वतःच्या खर्चाने तेथे पोहोचलेल्या आदिवासींनी किमान अचलपूरच्या एसडीओ कार्यालयात निवेदन स्वीकारण्याची विनंती केली. ही विनंतीही मान्य न झाल्याने संतप्त आदिवासींनी बंद कार्यालयासमोरच ठिय्या देत बैठकीच्या नवीन तारखेची मागणी केली.