उपमुख्यमंत्री अजित पवार यांचे अपघाती निधन झाल्याचे वृत्त शहरात धडकताच आमदार अमोल मिटकरी, राष्ट्रवादी काँग्रेस शरदचंद्र पवार पक्षाचे जिल्हाध्यक्ष संग्राम गावंडे यांच्यासह काही नेते, कार्यकर्ते बारामतीकडे रवाना झाले. पदाधिकारी रात्रीपर्यंत बारामतीत पोहोचले. गुरुवारी अंत्यसंस्काराच्या वेळी अकोल्यात ठिकठिकाणी श्रद्धांजली अर्पण करण्यात येणार आहे. जिल्ह्यात राष्ट्रवादी काँग्रेसच्या नेत्यांचा सहकार क्षेत्रावर प्रचंड प्रभाव आहे. जिल्हा बँक, बाजार समिती, खरेदी-विक्री संघ नेत्यांच्या ताब्यात आहे. त्यामुळे अजित दादा पवार यांच्याशी सहकार क्षेत्राशी स्नेह होता. अजित दादा पवार यांच्या अपघाती निधनाचे वृत्त पोहोचताच कार्यकर्त्यांसह त्यांचे चाहते शोकसागरात बुडाले. राष्ट्रवादी काँग्रेसचे प्रवक्ते आ. अमोल मिटकरी यांना अश्रू अनावर झाले. ते हंबरडा फोडतच गाडी बसून सकाळीच बारामतीकडे रवाना झाले. तसेच राकाँ (शरदचंद्र पवार) जिल्हाध्यक्ष संग्राम गावंडेही बारामतीकडे मार्गस्थ झाले. दरम्यान काही कार्यकर्ते जाण्याच्या तयारीत होते. मात्र बारामतीकडे राज्यातील अनेक भागातून दादांचे समथर्क, चाहते निघाल्याने आणि बारामतीमध्ये गुरुवारी अतिविशिष्ट व्यक्तींसह नागरिकांची प्रचंड गर्दी होणार असल्याने कार्यकर्त्यांना तूर्तास थांबण्याच्या सूचना देण्यात आल्या. त्यामुळे शहरात गुरुवारी श्रद्धांजली अर्पण करण्यात येणार असल्याचे पदाधिकाऱ्यांचे म्हणणे आहे. शहरात फलकांच्या माध्यमातून श्रद्धांजली : अजितदादांच्या निधनाचे वृत्त समजाच राकाँचे पदाधिकारी, कार्यकर्ते व चाहत्यांनी श्रद्धांजली अर्पण करणारे फलक लावले. अशोक वाटिका चौकासह अन्य ठिकाणी फलक लावण्यात आले. शासकीय कार्यालये बंद, शाळांना सुट्टी जाहीर राज्यात बुधवारी शासकीय सुटी जाहीर करण्यात आली असून तीन दिवसांचा दुखवटा जाहीर करण्यात आला आहे. तसेच तातडीने जिल्ह्यातील शाळांही सोडण्यात आल्या. तीन दिवसांचा दुखवटा जाहीर करण्यात आल्याने सांस्कृतिकसह अन्य कार्यक्रम होणार नाहीत. शासकीय सुट्टी जाहीर केल्यानंतर जिल्हाधिकारी कार्यालय, जिल्हा परिषदसह सर्वच कार्यालयामंध्ये शुकशुकाट होता. ग्रामीण भागातून सकाळीच घरुन अकोल्यासाठी निघालेले काही नागरिक जिल्हाधिकारी कार्यालय, जिल्हा परिषदेत पोहोचले होते. त्यांना शासकीय सुट्टी जाहीर केल्याचे कळल्यानंतर ते पुन्हा घराकडे निघाले.
राकाँचे आमदार, जिल्हाध्यक्ष बारामतीत; शाळांना सुटी जाहीर:आज कार्यकर्ते अर्पण करणार ठिकठिकाणी श्रद्धांजली
