चंद्रपूर महापालिकेत अडीच वर्षांचा फॉर्म्युला:विजय वडेट्टीवार यांनी घेतली उद्धव ठाकरे यांची भेट

चंद्रपूर महापालिकेतील महापौरपदाचा तिढा कायम असताना, काँग्रेस नेते विजय वडेट्टीवार यांनी मंगळवारी मातोश्रीवर उद्धव ठाकरे यांची भेट घेतली. या भेटीत अडीच वर्षांच्या महापौरपदाच्या फॉर्म्युल्यावर चर्चा झाल्याची माहिती सूत्रांनी दिली आहे. भाजपचे ज्येष्ठ नेते सुधीर मुनगंटीवार यांनी महापौर भाजपचाच होईल, असा दावा केला आहे, तर वडेट्टीवार यांनी भेटीनंतर महापौर काँग्रेसचा होईल, असे म्हटले. सूत्रांनुसार, वडेट्टीवार यांनी पहिले अडीच वर्षे काँग्रेसचा महापौर आणि स्थायी समिती अध्यक्ष असावा, तर पुढील अडीच वर्षे शिवसेना (उद्धव बाळासाहेब ठाकरे) गटाचा महापौर असावा, अशी विनंती केली. तसेच, उबाठाचे जिल्हाप्रमुख संदीप गिऱ्हे यांच्याशी समन्वय साधून कारभार करण्याची ग्वाही दिली. चंद्रपूर महापालिकेत एकूण ६६ जागा आहेत. बहुमतासाठी ३४ नगरसेवकांची आवश्यकता आहे. सध्या भाजपचे २३ आणि शिंदे गटाचा १ असे २४ नगरसेवक आहेत, तर काँग्रेसचे २७ नगरसेवक आहेत. शिवसेना (उबाठा) ६, वंचित बहुजन आघाडी २ आणि २ अपक्ष असे एकूण १० नगरसेवक आहेत. भाजपला १० तर काँग्रेसला ७ नगरसेवकांची गरज आहे. यामुळे शिवसेना (उबाठा) गटाची भूमिका महत्त्वाची ठरली आहे. काँग्रेसला २७ जागा मिळाल्यानंतरही महापौरपदासाठी अंतर्गत कलह सुरू झाला होता. प्रतिभा धानोरकर आणि विजय वडेट्टीवार यांच्यातील वादामुळे प्रदेशाध्यक्ष हर्षवर्धन सपकाळ यांना हस्तक्षेप करावा लागला. महापौर निवडण्याचे अधिकार धानोरकर यांना, तर स्थायी समिती सदस्य निवडण्याचे अधिकार वडेट्टीवार यांना देण्यात आले होते. गटनेता निवडण्याचा अधिकार प्रदेशाध्यक्षांकडे आहे. भेटीनंतर माध्यमांशी बोलताना विजय वडेट्टीवार यांनी भाजपचा दावा फेटाळून लावला. “पहिली अडीच वर्षे आम्हाला मिळावीत, अशी आम्ही विनंती केली आहे. उद्धव ठाकरे स्थानिक जिल्हाप्रमुखांशी बोलून निर्णय देतील,” असे वडेट्टीवार म्हणाले. ते पुढे म्हणाले की, महापौरपद कोणाला द्यायचे, याबाबत काँग्रेस प्रदेशाध्यक्ष हर्षवर्धन सपकाळ उद्धव ठाकरे यांच्याशी चर्चा करून निर्णय घेतील. महाविकास आघाडीकडे महापौर, उपमहापौर आणि स्थायी समिती ही पदे राहिली पाहिजेत, यातून तोडगा निघेल, असा विश्वास त्यांनी व्यक्त केला.