पत्नी लिव्ह-इनमध्ये राहत असल्याच्या रागातून पतीकडून खून:आरोपी पती अटकेत, पुण्याच्या वाडेबोल्हाई परिसरातील घटना

पत्नी दुसऱ्या व्यक्तीसोबत राहत असल्याच्या रागातून पतीने पत्नीची निर्घृण हत्या केल्याची धक्कादायक घटना पुणे जिल्ह्यातील वाडेबोल्हाई परिसरात उघडकीस आली आहे. दागिने परत देण्याचा बहाणा करत पत्नीला भेटीस बोलावून पतीने तिच्यावर चाकूने वार करत तिचा खून केल्याचे समोर आले आहे. या प्रकरणी लोणीकंद पोलिसांनी तातडीने कारवाई करत आरोपी पतीला अटक केली आहे. नम्रता शैलेंद्र व्हटकर (वय 19) असे मृत विवाहितेचे नाव असून, शैलेंद्र प्रकाश व्हटकर (वय 30, रा. बकोरी, ता. हवेली) असे अटक करण्यात आलेल्या आरोपीचे नाव आहे. या हत्याप्रकरणी नम्रताचा मित्र शाहरुख दस्तगीर पठाण याने लोणीकंद पोलिस ठाण्यात फिर्याद दिली आहे. 2 वर्षांपूर्वी झाला होता विवाह पोलिसांकडून मिळालेल्या माहितीनुसार, नम्रता आणि शैलेंद्र यांचा दोन वर्षांपूर्वी विवाह झाला होता. मात्र, सहा महिन्यांपूर्वी नम्रता एका खासगी कंपनीत नोकरी करत असताना तिची ओळख शाहरुख पठाण याच्याशी झाली. पुढे या ओळखीचे जवळिकीमध्ये रूपांतर झाले. याची माहिती पती शैलेंद्रला मिळाल्यानंतर दोघांमध्ये सतत वाद होऊ लागले. 2 महिन्यांपूर्वी सोडले घर या वादांना कंटाळून नम्रता गेल्या दोन महिन्यांपासून पतीचे घर सोडून शाहरुख पठाणसोबत लिव्ह-इन रिलेशनशिपमध्ये राहत होती. मात्र, तिचे सोन्याचे दागिने पती शैलेंद्रकडेच होते. दागिने परत मिळवण्यासाठी नम्रताने शैलेंद्रशी संपर्क साधला असता त्याने तिला वाडेबोल्हाई परिसरात भेटीस बोलावले. अन् त्याने वार केले 22 जानेवारी रोजी रात्री कामावरून परतल्यानंतर नम्रताने शाहरुखला दागिन्यांबाबतची माहिती दिली. त्यानुसार नम्रता, शाहरुख आणि त्यांचा मित्र हरिष हे तिघे रात्री साडेनऊच्या सुमारास वाडेबोल्हाई फाटा येथे पोहोचले. आरोपी शैलेंद्रने नम्रताला जोगेश्वरी शाळेच्या मागील बाजूस भेटण्यासाठी बोलावले होते. यावेळी शाहरुखला बाहेर थांबण्यास सांगून नम्रता एकटीच पतीकडे गेली. थोड्याच वेळात नम्रताच्या किंचाळण्याचा आवाज ऐकू आल्याने शाहरुख त्या दिशेने धावला. त्यावेळी शैलेंद्र आपल्या पत्नीच्या गळ्यावर व चेहऱ्यावर चाकूने सपासप वार करत असल्याचे त्याने पाहिले. शाहरुखला पाहताच आरोपीने घटनास्थळी चाकू आणि स्वतःची दुचाकी टाकून तेथून पलायन केले. आरोपी पतीला अटक गंभीर जखमी अवस्थेत नम्रताला तातडीने वाघोली येथील रुग्णालयात दाखल करण्यात आले. मात्र, उपचारापूर्वीच डॉक्टरांनी तिला मृत घोषित केले. घटनेनंतर लोणीकंद पोलिसांनी तातडीने तपास सुरू करत आरोपी शैलेंद्र व्हटकर याला अटक केली आहे. या प्रकरणाचा पुढील तपास वरिष्ठ पोलीस निरीक्षक सर्जेराज कुंभार यांच्या मार्गदर्शनाखाली सुरू आहे. या घटनेमुळे वाडेबोल्हाई परिसरात मोठी खळबळ उडाली आहे.