पूर्णा ते वसमत मार्गावर वाखारी शिवारात कालव्याच्या मार्गाने दुचाकीवर गांजा आणणाऱ्या दोन तरुणांना स्थानिक गुन्हे शाखा व वसमत ग्रामीण पोलिसांच्या पथकाने ताब्यात घेतले असून त्याच्याकडून तीन किलो 900 ग्राम गांजासह 1.78 लाख रुपयांचा मुद्देमाल जप्त केला आहे. या प्रकरणी वसमत ग्रामीण पोलिस ठाण्यात शनिवारी ता. 24 रात्री उशीरा गुन्हा दाखल झाला आहे. पोलिसांनी दिलेल्या माहितीनुसार पूर्णा येथून एक तरुण त्याच्या दुचाकीवर गांजा घेऊन वसमतकडे येणार असल्याची माहिती पोलिसांना मिळाली होती. सदर तरुण मुख्य रस्त्याने न येता कालव्याच्या मार्गावरून येत असल्याचीही माहिती पोलिसांना होती. त्यावरून पोलिस अधिक्षक निलाभ रोहन यांच्या मार्गदर्शनाखाली गुन्हे शाखेचे सहाय्यक पोलिस निरीक्षक शिवसांब घेवारे, वसमत ग्रामीण पोलिस ठाण्याचे सहाय्यक पोलिस निरीक्षक गजानन बोराटे, जमादार गजानन पोकळे, विजय उपरे, साईनाथ कंठे, हरिभाऊ गुंजकर, आकाश टापरे, भुजंग कोकरे, नरेंद्र साळवे, ज्ञानेश्वर गोरे, शिवाजी चालमिरे यांच्या पथकाने पूर्णा ते वसमत मार्गावरील कालव्यावर ठिकठिकाणी दुचाकी वाहनांची तपासणी सुरु केली होती. दरम्यान, सायंकाळच्या सुमारास पोलिसांनी एक दुचाकी थांबवली. दुचाकी वरील दोघांकडे असलेल्या साहित्याची तपासणी केली असता त्यात गांजा आढळून आला. सदर गांजाचे वजन 3 किलो 900 ग्राम असल्याचे स्पष्ट झाले. पोलिसांनी गांजा व दुचाकी वाहन असा 1.78 लाख रुपयांचा मु्द्देमाल जप्त केला आहे. या प्रकरणी जमादार गजानन पोकळे यांच्या तक्रारीवरून वसमत ग्रामीण पोलिस ठाण्यात दुचाकी चालक आनंद गायकवाड, योगेश सुर्यवंशी (रा. पूर्णा, जि. परभणी) यांच्या विरुध्द गुन्हा दाखल झाला आहे. सहाय्यक पोलिस निरीक्षक बोराटे पुढील तपास करीत आहेत.
पूर्णा-वसमत मार्गावर वाखारी शिवारात 3 किलो 900 ग्राम गांजा जप्त:दोन तरुणावर वसमत ग्रामीण पोलिस ठाण्यात गुन्हा दाखल
