कोल्हापुरात मतदानाच्या तोंडावर अघोरी प्रकार:शिवसेना ठाकरे गटाचे जिल्हाप्रमुख रविकिरण इंगवलेंवर 'भानामती'! परिसरात खळबळ

राज्यात महानगरपालिका निवडणुकीच्या मतदानाची रणधुमाळी शिगेला पोहोचली असतानाच, कोल्हापूर जिल्ह्यातील शिवसेना ठाकरे पक्षाचे जिल्हाप्रमुख रविकिरण इंगवले यांच्या विरोधात राधानगरी तालुक्यातील दुर्गमानवाड येथे ‘भानामती’ सारखा धक्कादायक आणि गंभीर प्रकार घडल्याचे उघडकीस आले आहे. मतदानाच्या अवघ्या एक दिवस आधी हा संतापजनक प्रकार समोर आल्याने संपूर्ण जिल्ह्यात मोठी खळबळ उडाली असून, राजकीय तसेच सामाजिक वर्तुळात या घटनेचे तीव्र पडसाद उमटत आहेत. ऐन निवडणुकीच्या धामधुमीत घडलेल्या या प्रकारामुळे कोल्हापूरमधील वातावरण अधिकच तापले आहे. गेल्या तीन-चार वर्षांपासून कोल्हापूर शहरातील स्थानिक नागरी समस्या, सामाजिक प्रश्न आणि विकासाच्या मुद्द्यांवर सातत्याने आंदोलने करणारे रविकिरण इंगवले यांनी महानगरपालिका निवडणुकीच्या रणधुमाळीत महायुतीच्या नेत्यांविरोधात आक्रमक पवित्रा घेतला होता. प्रचारसभांमधून त्यांनी सत्ताधारी नेत्यांवर भ्रष्टाचार, गुन्हेगारी पार्श्वभूमी आणि घराणेशाहीचे गंभीर आरोप करत जोरदार हल्ला चढवला. विशेषतः बलभीम बँक घोटाळा आणि आमदाराच्या पुत्राला दिलेली उमेदवारी यांसारख्या संवेदनशील मुद्द्यांवरून त्यांनी सत्ताधाऱ्यांची कोंडी करण्याचा प्रयत्न केल्याने निवडणुकीच्या मैदानात मोठी चर्चा रंगली होती. कोल्हापूर महानगरपालिकेच्या विविध प्रभागांतील रस्ते, पाणीपुरवठा आणि ड्रेनेज यांसारख्या मूलभूत नागरी प्रश्नांना सातत्याने वाचा फोडत रविकिरण इंगवले यांनी सामान्य जनतेमध्ये पक्षाची पकड अधिक मजबूत केली आहे. पक्षाच्या वचननामा प्रकाशन सोहळ्यात सक्रिय सहभाग घेत त्यांनी शहराच्या सर्वांगीण विकासाची भूमिका मांडली होती. विशेषतः निवडणुकीच्या रणधुमाळीत महायुतीच्या उमेदवारांविरुद्ध त्यांनी केलेले राजकीय आरोप अधिक तीव्र आणि टोकदार झाल्याने, मतदानाच्या तोंडावर त्यांनी सत्ताधाऱ्यांची मोठी कोंडी केल्याचे पाहायला मिळाले. सोमवारी मध्यरात्री भानामतीचा प्रकार राधानगरी तालुक्यातील दुर्गमानवाड देवस्थान मंदिराजवळ सोमवारी मध्यरात्री रविकिरण इंगवले यांचा फोटो झाडाला खिळे ठोकून त्यावर भानामतीचा अघोरी प्रकार केल्याचे उघडकीस आले आहे. या ठिकाणी काळी बाहुली, लिंबू आणि टाचण्या यांसारख्या साहित्याचा वापर करण्यात आला असून, मंगळवारी सकाळी ठाकरे गटाच्या कार्यकर्त्यांनी हा प्रकार पाहिल्यानंतर एकच खळबळ उडाली. मतदानाच्या अवघ्या एक दिवस आधी हा धक्कादायक प्रकार समोर आल्याने दुर्गमानवाड परिसरात भीतीचे वातावरण पसरले असून, संतप्त शिवसैनिकांनी आणि स्थानिक नागरिकांनी घटनास्थळी जमा होत या अघोरी कृत्याचा तीव्र शब्दांत निषेध व्यक्त केला आहे.