पुण्यात चक्क माजी मंत्र्यांकडूनच पैसे वाटप!:काँग्रेस नेते प्रशांत जगतापांचा बाळासाहेब शिवरकरांवर गंभीर आरोप, व्हिडिओ व्हायरल

महापालिका निवडणुकीच्या आदल्या दिवशी अनेक ठिकाणी पैसे वाटप करण्यात आल्याच्या अनेक घटना उघडकीस आल्या आहेत. आता असाच प्रकार पुण्याच्या वानवडी साळुंके विहार प्रभागात झाल्याचे समोर आले आहे. माजी मंत्र्यांनीच पैसे वाटल्याची धक्कादायक घटना घडली आहे. या संदर्भात कॉंग्रेसचे नेते प्रशांत जगताप यांनी याबाबतची माहिती दिली आहे. प्रशांत जगताप यांनी सांगितले की, आज दुपारपासून भाजपच्या दादागिरीला आणि पैसे वाटण्याच्या प्रकाराला उत आलेला आहे. खूप जोरदार पैसे वाटण्याचा प्रकार सुरू आहे. कुठलाही विकास प्रकल्प नसल्याने पैसे वाटण्याशिवाय पर्याय नाही. भाजपमध्ये गेलेले माजी मंत्री बाळासाहेब शिवरकर यांनी आज दुपारपासून पैसे वाटत आहेत, असा दावा जगताप यांनी केला आहे. पुढे बोलताना प्रशांत जगताप म्हणाले, बाळासाहेब शिवरकर यांनी त्यांच्या मुलाच्या प्रचारात पैसे वाटले आहेत. त्यांचे चिरंजीव अभिजीत शिवरकर हे माझ्या विरोधात निवडणूक लढवत आहेत. त्यांच्या उमेदवारांसाठी बाळासाहेब शिवरकर हे स्वतः पैसे वाटत आहेत. आमच्या कॉंग्रेसच्या कार्यकर्त्यांनी पकडले आणि आझाद नगर पोलिस ठाण्यात नेले आहे. त्यांना त्यांच्या गाडीसाह पोलिस ठाण्यात नेण्यात आले आहे. त्यांची आता चौकशी सुरू आहे. त्यांच्यावर गुन्हा दाखल करण्याची देखील आम्ही मागणी केली आहे. तसेच राज्य निवडणूक आयोगाने देखील त्यांच्यावर कायदेशीर कारवाई करावी, अशी मागणी जगताप यांनी केली आहे. पाहा व्हिडिओ