चांदुर रेल्वे नगर परिषदेच्या उपाध्यक्षपदी भाजपचे प्रमोद वानरे एका मताच्या फरकाने विजयी झाले आहेत. मंगळवार, १३ जानेवारी रोजी झालेल्या निवडणुकीत त्यांनी काँग्रेसचे उमेदवार अरिहंत गेडाम यांचा पराभव केला. यासोबतच निलेश विश्वकर्मा आणि डॉ. सुभाष पनपालिया य
.
नवनिर्वाचित अध्यक्ष प्रा. प्रियंका विश्वकर्मा यांच्या अध्यक्षतेखाली ही निवडणूक प्रक्रिया पार पडली. उपाध्यक्षपदासाठी भाजपतर्फे बच्चू उर्फ प्रमोद वानरे आणि काँग्रेसतर्फे अरिहंत गेडाम रिंगणात होते. पीठासीन सभापतींनी हात उंचावून मतदान घेण्याचे निर्देश दिले.
या मतदानात नगराध्यक्षांच्या मतासह अरिहंत गेडाम यांना १० मते मिळाली. तर, भाजप एकसंघ राहिल्याने बच्चू उर्फ प्रमोद वानरे यांना ११ मते मिळाली. त्यामुळे प्रा. प्रियंका विश्वकर्मा यांनी प्रमोद वानरे यांना उपाध्यक्ष म्हणून घोषित केले.
यानंतर स्वीकृत सदस्यांच्या नावांचीही घोषणा करण्यात आली. भाजपचे गटनेते म्हणून पप्पू उर्फ निलेश भालेराव आणि काँग्रेसचे गटनेते म्हणून हाजी मोहम्मद अनीस सौदागर यांच्या नावांचीही यावेळी घोषणा झाली. मतदान प्रक्रियेमध्ये मुख्याधिकारी सुप्रिया टवलारे यांच्यासह न.प. कर्मचारी रुपेश नानवटकर, जितेंद्र खवसे, उमेश ढेरे आणि विशाल तुर्तकर यांनी सहायक म्हणून कामकाज पाहिले.
चांदुर रेल्वेच्या २० सदस्यीय सभागृहात भाजपचे सर्वाधिक ११ सदस्य आहेत. काँग्रेसचे ५, आपलं चांदूरचे (वंचित बहुजन आघाडी) दोन, अपक्ष दोन आणि भारतीय कम्युनिस्ट पक्षाचा एक नगरसेवक आहे. निवडणुकीपूर्वी भाजप आणि काँग्रेस वगळता इतर चार नगरसेवकांनी एक गट तयार केला होता.
उपाध्यक्षपदाच्या निवडीवेळी या गटासोबतच नगराध्यक्षांनीही काँग्रेसला कौल दिला होता. त्यामुळे गेडाम यांना १० मते मिळाली. मात्र, भाजप एकसंध राहिल्याने त्यांना एका मताच्या फरकाने पराभव पत्करावा लागला.
