मोर्शी नगरपरिषदेच्या उपाध्यक्षपदी राष्ट्रवादी काँग्रेस पार्टी (शरद पवार गट) चे डॉ. प्रदीप कुऱ्हाडे यांची अविरोध निवड झाली आहे. या पदासाठी ते एकमेव उमेदवार असल्याने त्यांची निवड बिनविरोध झाली.
.
नगराध्यक्षा प्रतीक्षा रवी गुल्हाने यांच्या अध्यक्षतेखाली मंगळवारी नवनिर्वाचित पदाधिकाऱ्यांची पहिली सभा पार पडली. यावेळी मुख्य अधिकारी शिवदास मुसळे आणि प्रशासकीय अधिकारी अमोल ढोले यांनी सहायक अधिकारी म्हणून कामकाज पाहिले.
याच बैठकीत तीन स्वीकृत सदस्यही निवडायचे होते. राष्ट्रवादी काँग्रेस (शरद पवार गट) चा एक उमेदवार अस्वीकृत झाल्याने एक पद रिक्त ठेवण्यात आले. उर्वरित दोन स्वीकृत सदस्यांपैकी भारतीय राष्ट्रीय काँग्रेसचे सय्यद रियाज सय्यद हमजा यांची अविरोध निवड झाली. भारतीय जनता पक्षातर्फे ॲड. जयंत ढोले, ज्योतीप्रसाद मालवीय आणि सरिता सचिन उमाळे यांनी अर्ज दाखल केले होते. भाजपाच्या गटनेत्या प्रीती ब्रह्मानंद देशमुख यांनी सरिता उमाळे यांच्या नावाला स्वीकृती दिल्याने त्यांची दुसऱ्या स्वीकृत सदस्य म्हणून नियुक्ती करण्यात आली.
या बैठकीत विविध पक्षांचे गटनेतेही जाहीर करण्यात आले. भाजपाच्या गटनेत्या म्हणून प्रीती ब्रह्मानंद देशमुख, भारतीय राष्ट्रीय काँग्रेस पक्षाच्या गटनेत्या म्हणून राखी गौरव खेरडे, तर राष्ट्रवादी काँग्रेसच्या (शरद पवार गट) गटनेतेपदी डॉ. प्रदीप कुऱ्हाडे यांची नियुक्ती करण्यात आली.
या सभेत सर्व २४ नगरसेवक उपस्थित होते. त्यांनी एकमताने डॉ. प्रदीप कुऱ्हाडे यांच्या उपाध्यक्षपदाच्या नियुक्तीस मान्यता दिली. यावेळी नगरपरिषदेचे कर्मचारी, पत्रकार तसेच मोर्शी शहरातील नागरिक मोठ्या संख्येने उपस्थित होते.
