शेंदुरजनाघाट नगरपरिषदेच्या उपाध्यक्षपदी भाजपच्या सुनिता वंजारी यांची बिनविरोध निवड झाली आहे. मंगळवार, १३ जानेवारी रोजी झालेल्या या निवडणुकीत त्या अविरोध विजयी झाल्या. याच बैठकीत दोन स्वीकृत सदस्यांचीही घोषणा करण्यात आली.
.
नवनिर्वाचित नगराध्यक्ष आणि नगरसेवकांची पहिली सभा मंगळवारी नगरपालिका सभागृहात पार पडली. उपाध्यक्षपदासाठी संदीप बाबाराव खडसे आणि सुनिता जीवन वंजारी यांनी उमेदवारी अर्ज दाखल केले होते. मात्र, माघारीच्या वेळी संदीप खडसे यांनी आपला अर्ज मागे घेतल्याने, सुनिता वंजारी यांचा एकमेव अर्ज कायम राहिला आणि त्यांची बिनविरोध उपाध्यक्ष म्हणून घोषणा करण्यात आली.
दरम्यान, स्वीकृत नगरसेवक पदासाठी भारतीय जनता पक्षाकडून निलेश अण्णा फुटाणे आणि राष्ट्रवादी काँग्रेसच्या (अजित पवार गट) वतीने विशाल सावरकर यांची निवड करण्यात आली. मुख्याधिकारी गजानन भोयर यांनी या बैठकीत सहायक निवडणूक अधिकारी म्हणून कामकाज पाहिले.
नगराध्यक्ष तथा पिठासीन सभापती सुवर्णा वरखेडे यांच्या अध्यक्षतेखाली ही सर्वसाधारण सभा पार पडली. संख्याबळानुसार दोन स्वीकृत नगरसेवकांची निवड करायची होती. सत्ताधारी पक्षाला स्पष्ट बहुमत असल्याने भाजपच्या वतीने निलेश फुटाणे, तर विरोधी पक्ष राष्ट्रवादी काँग्रेसच्या (अजित पवार गट) वतीने विशाल सावरकर यांची निवड झाली. भाजपचे गटनेता म्हणून प्रशांत सावरकर आणि राष्ट्रवादी काँग्रेसच्या (अजित पवार गट) गटनेते म्हणून संदीप खडसे यांच्या नावावरही शिक्कामोर्तब झाले. शेंदूरजनाघाट नगरपरिषदेत भाजपचे ११, राष्ट्रवादी काँग्रेस (अजित पवार गट) ६, शिवसेना (शिंदे गट) २ आणि १ अपक्ष असे पक्षीय बलाबल आहे.
