देशातील आठवे ज्योतिर्लिंग औंढा नागनाथ येथे पूजा, अभिषेक, दर्शनासाठी आता ऑनलाईन नोंदणी करता येणार, देशभरातील भाविकांची सोय
.
देशातील मोठ्या देवस्थानांच्या धर्तीवर देशातील आठवे ज्योतिर्लिंग औंढा नागनाथ येथे आता पूजा, अभिषेक, दर्शनासाठी आता ऑनलाईन नोंदणी करता येणार असून त्यासाठी जिल्हाधिकारी राहुल गुप्ता यांच्या पुढाकारातून संस्थानची वेबसाईट तयार करण्यात आली आहे. त्यामुळे आता देशभरातील भाविकांची मोठी सोय होणार आहे.
देशातील आठवे ज्योतिर्लिंग म्हणून औंढा नागनाथची ओळख आहे. भारतातील एकमेव भूमिगत ज्योतिर्लिंग आहे. या ठिकाणी दरवर्षी 25 लाख भाविक नागनाथाच्या दर्शनासाठी येतात. देशभरातून भाविक येत असतांनाही या ठिकाणी पुरेशा सुविधा उपलब्ध होत नाहीत. या शिवाय भाविकांसाठी ऑनलाईन बुकींगची सुविधा नसल्यामुळे त्यांना दर्शनरांगेत उभे राहून मोठा त्रास सहन करावा लागतो. याशिवाय पुजा, अभिषेक यासाठीही त्यांची मोठी अडचण होते.
या ठिकाणी येणाऱ्या भाविाकांची संख्या दुप्पट म्हणजेच ५० लाख करण्यासाठी शासनाने औंढा नागनाथ तीर्थक्षेत्राचा विकास करण्यासाठी उच्चाधिकार समिती स्थापन केली आहे. औंढा नागनाथ तीर्थक्षेत्राचा विकास करण्यासाठी जिल्ह्याच्या पालक सचिव रिचा बागला यांच्या मार्गदर्शनाखाली भक्तनिवास, पार्कींग सुविधा, मुझियम, पार्क, लाईटींग यासह विविध अत्याधुनिक सुविधा उपलब्ध करुन देण्यासाठी २६० कोटी रुपयाचा आराखडा तयार करण्यात आला आहे. या आराखड्याला लवकरच उच्चाधिकार समितीची मान्यता घेऊन अंतिम करण्यात येणार आहे.
दरम्यान, या ठिकाणी येणाऱ्या भाविकांची अडचण लक्षात घेऊन जिल्हाधिकारी राहुल गुप्ता यांनी संस्थानची वेबसाईट तयार करून त्यामाध्यमातून ऑनलाईन नोंदणी करण्याची सुविधा उपलब्ध करून देण्याचा निर्णय घेतला होता. त्यानुसार संस्थानच्या वेबसाईटचे काम पूर्ण झाले असून आता भाविकांना ऑनलाईन नोंदणी करता येणार आहे. भाविकांनी निवडलेल्या वेळेत त्यांच्या दर्शनाची व्यवस्था होणार असून पुजा, अभिषेक करण्यासाठी नोंदणी केल्यानंतर तातडीने पुरोहित उपलब्ध करून दिले जाणार आहेत. त्यामुळे देशभरातून येणाऱ्या भाविकांची मोठी सोय झाली आहे.
ऑनलाइन प्रणालीद्वारे भाविकांना विशेष सेवा उपलब्ध करून देण्यात आल्या आहेत. महाअभिषेक (पूर्ण विधी व वैदिक मंत्रोच्चारासह) रुद्राभिषेक, लघु अभिषेक व साधी पूजा, सकाळ व संध्याकाळ आरती बुकिंग, वर्षभराचे वेळापत्रक, दर्शनासाठी आगाऊ स्लॉट बुकिंग मंदिर विकासासाठी ऑनलाइन दानाचा यात समावेश आहे.
आगामी सण व उत्सव
आगामी सण उत्सवामध्ये ता. १५ फेब्रुवारी रोजी महाशिवरात्री उत्सव आहे. तसेच ऑगस्ट–सप्टेंबर श्रावण महिना अाहे. यावेळी प्रत्येक सोमवारी विशेष दर्शन असेल. ता. १७ ऑगस्ट रोजी नागपंचमी असून यावेळी नागदेवतेची विशेष पुजा होते.
नागनाथ संस्थानच्या वेबसाईटची लिंक
भाविकांनीhttps://www.figma.com/proto/j5Cb4MCK0faWCB5QKFORrA/Responsive?node-id=1-4&t=51ZTrh34krARWPMu-0&scaling=min-zoom&content-scaling=fixed&page-id=0%3A1 या संकेतस्थळावर भेट द्यावी.
