Manikrao Kokate Housing Scam Supreme Court Stay Sentence Bail Hearing Relief | सदनिका घोटाळा प्रकरण: माणिकराव कोकाटे जामीन प्रक्रियेसाठी रुग्णालयातून थेट न्यायालयात, माध्यमांशी बोलणेही टाळले – Mumbai News

.

नाशिकमधील प्रथमवर्ग न्यायदंडाधिकाऱ्यांनी फेब्रुवारी महिन्यात याप्रकरणी माणिकराव कोकाटे आणि त्यांच्या बंधूंना दोषी ठरवून दोन वर्षांच्या कारावासाची शिक्षा सुनावली होती. त्यानंतर डिसेंबर महिन्यात नाशिक जिल्हा सत्र न्यायालयानेही ही शिक्षा कायम ठेवली होती. मात्र, आता सर्वोच्च न्यायालयाने या शिक्षेला स्थगिती दिल्याने कोकाटे यांना मोठा दिलासा मिळाला असून, त्या पार्श्वभूमीवर त्यांनी आज जामिनासाठी न्यायालयात धाव घेतली.

नाशिक जिल्हा सत्र न्यायालयाने शिक्षा कायम ठेवल्यानंतर पोलिसांनी माणिकराव कोकाटे यांना ताब्यात घेण्याच्या हालचाली सुरू केल्या होत्या. मात्र, याच काळात प्रकृती बिघडल्याने कोकाटे रुग्णालयात दाखल झाले. त्यांनी कायदेशीर दिलासा मिळवण्यासाठी मुंबई उच्च न्यायालय आणि त्यानंतर सर्वोच्च न्यायालयात धाव घेतली होती. अखेर सर्वोच्च न्यायालयाने त्यांच्या शिक्षेला स्थगिती दिल्याने कोकाटे यांना मोठा दिलासा मिळाला आणि त्यांची अटकेच्या कारवाईतून तात्पुरती सुटका झाली.

सर्वोच्च न्यायालयाच्या या निर्णयानंतर जामीन प्रक्रियेची पूर्तता करण्यासाठी माणिकराव कोकाटे आज रुग्णालयातून थेट न्यायालयात हजर झाले. जामीन अर्जावर स्वाक्षरी केल्यानंतर प्रसारमाध्यमांनी त्यांना या संपूर्ण कायदेशीर संघर्षाबद्दल आणि पुढील भूमिकेबद्दल विचारले असता, त्यांनी अधिक बोलणे टाळले. काय बोलायचे ते माझ्या वकिलांशी बोला, मला आता थोडा आराम करू द्या, मला काही नको आहे, अशी त्रोटक प्रतिक्रिया देत त्यांनी आपली बाजू मांडण्याचे टाळले.