उद्धवसेनेकडून ६ दिवस ‘सांस्कृतिक मंडळ’ आरक्षित; विरोधकांच्या कोंडीचा प्रयत्न
.
कोणत्याही पक्षाला किंवा उमेदवाराला एकच मैदान, सभागृह किंवा सभास्थळ सलग ८ ते १० दिवस आरक्षित ठेवण्यास परवानगी दिली जाणार नाही. सर्व पक्षांना प्रचारासाठी समान संधी मिळावी यासाठी प्रशासनाने काटेकोर अंमलबजावणी करावी, असे आदेश मनपा आयुक्त जी. श्रीकांत यांनी दिले आहेत. विशेष म्हणजे १० जानेवारीला संभाजीनगरमध्ये उद्धव ठाकरे यांची सभा होणार आहे. पक्षाने तब्बल ६ दिवस मराठवाडा संस्कृतीला मंडळाचे मैदान शिवसेना उद्धवसेनेने आरक्षित करून ठेवले आहे.
१५ जानेवारी रोजी मतदान होणार आहे. या पार्श्वभूमीवर आज निवडणूक नियोजन, प्रचार व्यवस्थापन, मनुष्यबळ, प्रशिक्षण व आचारसंहिता अंमलबजावणीचा सविस्तर आढावा घेण्यात आला. शासकीय, निमशासकीय व खासगी स्थळे कोणत्याही एका पक्षाच्या ताब्यात राहणार नाहीत याची खबरदारी घेण्याचे आदेश श्रीकांत यांनी दिले. एकाच स्थळासाठी दोन पक्षांचे अर्ज आल्यास प्रथम अर्ज करणाऱ्याला प्राधान्य देण्यात यावे, असेही त्यांनी सांगितले.
प्रत्येकी ९ निवडणूक निर्णय अधिकारी कार्यालयांतील सुविधा सहायक निवडणूक निर्णय अधिकाऱ्यांमार्फत तपासण्यात आल्या. मतदान सुरळीत पार पडण्यासाठी आवश्यक मनुष्यबळ, साहित्य व तांत्रिक सुविधा वेळेत उपलब्ध करून देण्यावर भर देण्यात आला. आज होणाऱ्या मतदानासाठी केंद्रप्रमुख व कर्मचाऱ्यांच्या प्रशिक्षणाची तयारी झाली आहे. प्रशिक्षण दर्जेदार व प्रभावी व्हावे यासाठी श्रीकांत यांनी सूचना दिल्या. मतदान प्रक्रियेतील जबाबदाऱ्या, नियम व आपत्कालीन परिस्थितीतील कार्यपद्धती यांची माहिती कर्मचाऱ्यांना दिली जावी, असे निर्देश त्यांनी दिले.
प्रत्येक १० ते १५ मतदान केंद्रांमागे एक विभागीय अधिकारी नेमावा. कर्मचारी अपुरे आहेत तेथे तातडीने मनुष्यबळ द्यावे, असेही त्यांनी सांगितले. शहरात प्रथमच प्रभाग पद्धतीने निवडणूक होत असल्याने जनजागृती आवश्यक आहे. यासाठी प्रत्येक निवडणूक निर्णय अधिकारी कार्यालयात ‘डेमो ईव्हीएम’ ठेवण्याचे आदेश देण्यात आले.
निवडणूक कामाला नकार दिल्यास गुन्हे
निवडणूक आदेश असूनही जे अधिकारी व कर्मचारी अद्याप रुजू झालेले नाहीत त्यांच्याविरुद्ध गुन्हे दाखल करण्याचे आदेश जी. श्रीकांत यांनी दिले. आचारसंहिता कक्षाच्या आढाव्यात एसएसटी पथकातील अनेक कर्मचारी अनुपस्थित असल्याचे समोर आले. संबंधित यंत्रणांना गुन्हा दाखल करण्याची प्रक्रिया सुरू करण्याचे निर्देश देण्यात आले.
आधी बुकिंग केलेल्या मैदानांना आदेश लागू नाही
महापालिका आयुक्तांनी दिलेला आदेश याआधी आरक्षित केलेल्या मैदानांसाठी लागू होणार नाही, अशी माहिती महापालिकेतील उच्चपदस्थ सूत्रांनी दिली. त्यामुळे उद्धवसेनेने ६ ते ११ जानेवारी यादरम्यान मैदानाचे ‘बुकिंग’ केले आहे. त्यावर काही परिणाम होणार नसल्याचे या सूत्रांनी सांगितले. त्यामुळे आता महायुतीला ११ जानेवारीनंतरच सांस्कृतिक मंडळाचे मैदान उपलब्ध होणार आहे.
