[ads1]
मराठा आरक्षणाच्या मागणीसाठी मनोज जरांगे यांनी सुरू केलेल्या उपोषणाला पाठिंबा देण्यासाठी सिल्लोड तालुक्यातील सकल मराठा समाजाच्या वतीने गुरेढोरे आणि बैलगाड्यांसह धानोरा फाटा येथे गुरुवारी तब्बल एक तास भव्य रास्ता रोको आंदोलन करण्यात आले. उपोषणाचा आज सहावा दिवस असल्याने आंदोलनस्थळी मराठा बांधवांची मोठी गर्दी झाली होती. सिल्लोड तालुक्यासह पंचक्रोशीतील गावांमधून मोठ्या संख्येने मराठा बांधव आंदोलनात सहभागी झाले. बैलगाड्या आणि गुरेढोरे रस्त्यावर आणत आंदोलकांनी शासनाचे लक्ष मराठा आरक्षणाच्या मागण्यांकडे वेधले. यावेळी विविध मागण्यांच्या समर्थनार्थ जोरदार घोषणाबाजी करण्यात आली. त्यामुळे काही काळ धानोरा फाटा परिसरातील वाहतूक विस्कळीत झाली. आंदोलनाला उत्स्फूर्त प्रतिसाद मिळाल्याने परिसरात मोठ्या प्रमाणात गर्दी झाली होती. परिस्थिती नियंत्रणात ठेवण्यासाठी सिल्लोड ग्रामीण पोलिसांकडून बंदोबस्त तैनात करण्यात आला होता. रास्ता रोको आंदोलनादरम्यान प्रशासनाच्या वतीने सिल्लोडचे तहसीलदार सागर वाघमारे यांनी आंदोलकांचे निवेदन स्वीकारले. मराठा आरक्षणासंदर्भातील मागण्यांवर शासनाने तातडीने ठोस निर्णय घ्यावा, अशी मागणी यावेळी करण्यात आली. यावेळी सिल्लोड ग्रामीण पोलीस ठाण्याचे सहाय्यक पोलीस निरीक्षक रवींद्र ठाकूर, सहाय्यक पोलीस निरीक्षक मनीष जाधव, पोलीस उपनिरीक्षक अनिल धनुरे, पोलीस उपनिरीक्षक चव्हाण, बीट जमादार वाय. एस. कुलकर्णी यांच्यासह राजेंद्र काकडे, दादासाहेब पवार, संजय आगे, रवींद्र आंबेकर, सचिन काळे तसेच अन्य पोलीस अधिकारी व कर्मचारी उपस्थित होते. कोणत्या मागण्यांवर जरांगे पाटील ठाम? मनोज जरांगे पाटील यांच्या आंदोलनाच्या पार्श्वभूमीवर मराठा समाजाकडून विविध मागण्या करण्यात येत आहेत. ज्या भागात जुन्या नोंदींमध्ये कुणबी उल्लेख आढळतो, त्या नोंदींच्या आधारे पात्र मराठा व्यक्तींना कुणबी प्रमाणपत्र देण्याची प्रक्रिया सुलभ आणि गतिमान करावी, अशी प्रमुख मागणी आहे. तसेच कुणबी प्रमाणपत्रासाठी आवश्यक कागदपत्रे आणि पडताळणीची प्रक्रिया सुलभ करावी, पात्र व्यक्तींना प्रमाणपत्र मिळण्यात अडथळे येऊ नयेत आणि मराठा आरक्षणाच्या आंदोलनादरम्यान आंदोलकांवर दाखल झालेले गुन्हे मागे घ्यावेत, या मागण्यांवरही आंदोलक ठाम असल्याचे सांगितले जात आहे. सरकार आणि जरांगे पाटील यांच्यात झालेल्या चर्चेनंतर काही मागण्यांबाबत सकारात्मक संकेत मिळाल्याचे सांगितले जात असले, तरी सर्व मागण्यांवर अंतिम आणि ठोस निर्णय होणे बाकी असल्याची भूमिका आंदोलकांकडून व्यक्त केली जात आहे. राज्यभर आंदोलनाची धग कायम मनोज जरांगे पाटील यांच्या उपोषणाचा सहावा दिवस सुरू असताना त्यांच्या आंदोलनाला राज्यातील विविध भागांतून पाठिंबा मिळत आहे. मराठा समाजाच्या वतीने ठिकठिकाणी रास्ता रोको, बंद, निदर्शने आणि विविध प्रकारची आंदोलने करण्यात येत आहेत. सिल्लोड तालुक्यातील धानोरा फाटा येथे झालेल्या आंदोलनातूनही मराठा आरक्षणाचा मुद्दा पुन्हा एकदा चर्चेत आला आहे. ग्रामीण भागातून मोठ्या संख्येने आंदोलक रस्त्यावर उतरल्याने सरकारसमोर मराठा आरक्षणाच्या मागण्यांवर ठोस निर्णय घेण्याचे आव्हान निर्माण झाले आहे. दरम्यान, जरांगे पाटील यांच्या प्रकृतीबाबतही समर्थकांकडून चिंता व्यक्त केली जात आहे. सरकारकडून दिली जाणारी आश्वासने प्रत्यक्षात कधी आणि कोणत्या पद्धतीने लागू होतात, तसेच मागण्यांवर ठोस निर्णय झाल्यानंतर जरांगे पाटील उपोषण मागे घेणार का, याकडे आता मराठा समाजासह संपूर्ण राज्याचे लक्ष लागले आहे.
हेही वाचा.. सरकारने जरांगे पाटलांच्या 90% मागण्या पूर्ण केल्या!:गिरीश महाजन यांचे मोठे विधान; कुंभमेळा व अजितदादांच्या अपघातावरही भाष्य मराठा आरक्षणासाठी आंतरवाली सराटी येथे सुरू असलेल्या आंदोलनावर तोडगा काढण्यासाठी सरकार पूर्णपणे सकारात्मक असून, मनोज जरांगे पाटील यांच्या जवळपास 90टक्के मागण्या शासनाने पूर्ण केल्या आहेत, असा दावा राज्याचे जलसंपदा मंत्री तथा नाशिकचे पालकमंत्री गिरीश महाजन यांनी केला आहे. नवी दिल्ली येथे आयोजित जलसंधारण मंत्र्यांच्या ‘जलमंथन’ परिषदेनंतर माध्यमांशी संवाद साधताना त्यांनी जरांगे यांच्या आंदोलनासह तापी मेगा रिचार्ज प्रकल्प, नाशिक सिंहस्थ कुंभमेळा आणि अजित पवार यांच्या विमान अपघातावरून विरोधकांकडून केल्या जाणाऱ्या आरोपांवर सविस्तर भूमिका मांडली.सविस्तर वाचा..
[ads2]
गुरेढोरे-बैलगाड्यांसह मराठा बांधव रस्त्यावर:सिल्लोडमध्ये रास्ता रोको, जरांगेंच्या समर्थनार्थ जोरदार घोषणाबाजी
Leave a Reply