अमरावती जिल्ह्यात दोन दिवसांपूर्वी ३ अंशांनी वाढलेले तापमान पुन्हा खाली घसरले आहे. सोमवार रात्रीपासून ढगाळ वातावरणामुळे मंगळवारी दिवसभर पारा ३ अंशांनी खाली आला. जलविज्ञान प्रकल्प कार्यालयाच्या नोंदीनुसार, यावर्षीचा फेब्रुवारी महिना गतवर्षीच्या तुलनेत थंड राहिला आहे. गेल्या दोन दिवसांपूर्वी जिल्ह्याचा पारा ३५.२ अंशांवर पोहोचला होता. २१ फेब्रुवारी रोजी तापमान ३२ अंश सेल्सिअस होते, तर २३ फेब्रुवारी रोजी ते ३५.२ अंश सेल्सिअसवर पोहोचले. मात्र, मंगळवारी ते पुन्हा पूर्ववत झाले. हवामान खात्याने दिलेल्या अंदाजानुसार, गेल्या तीन दिवसांपासून विदर्भ आणि मराठवाड्यात वातावरणीय बदलांची मालिका सुरू आहे. सोमवारी नागपूर, चंद्रपूर, यवतमाळसह विदर्भात काही ठिकाणी अवकाळी पाऊस आणि गारपीट झाली. मराठवाड्यातील अनेक जिल्ह्यांमध्येही अशीच स्थिती होती. येत्या एक-दोन दिवसांत अमरावतीतही अशीच स्थिती दिसू शकते, असे हवामानतज्ज्ञांचे म्हणणे आहे. सध्या दिवसा उष्णता आणि रात्री गारवा असे वातावरण आहे. यामुळे दिवसा पंख्याशिवाय काम भागत नाही, तर रात्री ब्लँकेटची गरज भासते. हवामानातील या बदलामुळे नागरिकांच्या आरोग्यावरही परिणाम होत असून, वैद्यकीय क्षेत्राकडून नागरिकांना सतर्क राहण्याचा सल्ला देण्यात आला आहे.
अमरावतीत तापमान पुन्हा खाली घसरले:दोन दिवसांपूर्वी वाढलेले तापमान, यंदाचा फेब्रुवारी गतवर्षीपेक्षा थंड
