आपल्या अभिनयाने आणि त्याहूनही अधिक आपल्या सामाजिक कार्याने महाराष्ट्राच्या घराघरांत पोहोचलेले ज्येष्ठ अभिनेते नाना पाटेकर यांचे ८ ऑक्टोबर रोजी हृदयविकाराच्या तीव्र झटक्याने निधन झाले. त्यांच्या या अचानक जाण्याने कलाविश्वासह संपूर्ण राज्यभरात मोठी हळहळ व्यक्त केली जात आहे. अमिताभ बच्चन, शाहरुख खान यांच्यासह अनेक दिग्गजांनी त्यांना श्रद्धांजली वाहिली. याच पार्श्वभूमीवर, बुधवारी मुंबईत नाना पाटेकर यांच्या स्मरणार्थ एका विशेष शोकसभेचे आयोजन करण्यात आले होते. या सभेला मराठी आणि हिंदी सिनेसृष्टीतील अनेक दिग्गजांसह राज्याचे अन्न व औषध प्रशासन (FDA) आयुक्त तुकाराम मुंढे हेदेखील उपस्थित होते. यावेळी नानांच्या आठवणी सांगताना या डॅशिंग अधिकाऱ्यालाही अश्रू अनावर झाले. ‘शेतकऱ्यांच्या बांधावर त्यांचा अभिनय संपायचा’ नाना पाटेकर यांच्या खऱ्या स्वभावावर भाष्य करताना तुकाराम मुंढे म्हणाले, “पडद्यावर किंवा वरवर पाहता नाना खूप रागीट वाटायचे. पण त्यांच्यातला खरा माणूस वेगळाच होता. जेव्हा दुष्काळग्रस्त शेतकऱ्यांच्या व्यथा जाणून घेण्यासाठी नाना प्रत्यक्ष बांधावर जायचे, तेव्हा त्यांच्यातला अभिनेता पूर्णपणे संपायचा आणि एक अत्यंत हळवा माणूस जागा व्हायचा.” जेव्हा नाना पाटेकर मुंढेंच्या घरी गेले… आपल्या आणि नानांच्या पहिल्या भेटीचा प्रसंग सांगताना मुंढे भूतकाळात रमले. २०१५ सालच्या भीषण दुष्काळाची आठवण सांगताना ते म्हणाले, “त्यावेळी मी सोलापूर जिल्ह्याचा जिल्हाधिकारी म्हणून कार्यरत होतो. दुष्काळग्रस्त शेतकऱ्यांना मदत करण्यासाठी ‘नाम फाऊंडेशन’च्या माध्यमातून नाना पाटेकर आणि मकरंद अनासपुरे सोलापुरात आले होते. ही माहिती मिळताच मी स्वतः नानांना भेटण्याची विनंती केली. माझ्या एका शब्दावर ते कार्यालयात आले आणि त्यानंतर त्यांनी माझ्या शासकीय निवासस्थानी येऊन माझ्यासोबत दुपारचे जेवणही केले. ती आमची पहिलीच भेट होती, पण त्यावेळी आमच्यात खूप गप्पा झाल्या.” ‘शासनालाही शक्य नाही, एवढी मोठी मदत नानांनी केली’ त्या भेटीनंतर नाना आणि मुंढे यांच्यात नेहमी संवाद होत असे. “आपल्याच माणसांना जर आपण मदत करू शकत नसलो, तर मग आपण कसले माणूस?” हे नानांचे वाक्य मुंढेंनी आवर्जून सांगितले. नाना पाटेकरांनी उभी केलेली मदतीची साखळी हजारो, लाखो नव्हे तर कोट्यवधी शेतकऱ्यांपर्यंत पोहोचली. “एवढ्या मोठ्या प्रमाणावर मदत करणे कधी-कधी शासन व्यवस्थेलाही शक्य होत नाही, ते काम नानांनी करून दाखवले,” अशी अत्यंत प्रांजळ कबुली देत तुकाराम मुंढे यावेळी भावूक झाले. पडद्यावरील ‘हिरो’पेक्षाही खऱ्या आयुष्यात शेतकऱ्यांचा तारणहार बनलेल्या नाना पाटेकरांच्या या आठवणींनी शोकसभेतील प्रत्येकाचेच डोळे पाणावले. —————- हेही वाचा.. MPSC आयोगाला रोहित पवारांचा थेट इशारा:म्हणाले- तुकाराम मुंढेंच्या धाकाचा परिणाम आहे का? जुनी कागदपत्रे नष्ट करण्यास विरोध
महाराष्ट्र लोकसेवा आयोगातील (MPSC) कथित पेपरफुटी आणि गैरप्रकारांच्या विरोधात विद्यार्थ्यांसोबत सलग अकरा दिवस रस्त्यावर उतरून आंदोलन करणारे राष्ट्रवादी काँग्रेसचे (शरद पवार गट) आमदार रोहित पवार यांनी आयोगाला पुन्हा एकदा कडक शब्दांत इशारा दिला आहे. ‘आंदोलन स्थगित केले म्हणजे प्रकरण संपले, अशा भ्रमात कुणीही राहू नये,’ असे सुनावत त्यांनी आयोगाच्या जुनी कागदपत्रे नष्ट करण्याच्या निर्णयावर तीव्र आक्षेप नोंदवला आहे. सविस्तर वाचा