प्रा. यास्मिन शेख, डॉ. चाफेकर यांना जीवनगौरव पुरस्कार:आठव्या राष्ट्रभक्ती साहित्य संमेलनात कर्नाळा ट्रस्टतर्फे सन्मान

कर्नाळा चॅरिटेबल ट्रस्टतर्फे आयोजित आठव्या राष्ट्रभक्ती साहित्य संमेलनात प्रा. यास्मिन शेख आणि डॉ. अविनाश चाफेकर यांना जीवनगौरव पुरस्काराने सन्मानित करण्यात येणार आहे. प्रा. यास्मिन शेख यांना “शिक्षणप्रेमी शांतारामशेठ शहासने” जीवनगौरव पुरस्कार, तर डॉ. अविनाश चाफेकर यांना “कवयित्री उर्मिलाताई कराड” जीवनगौरव पुरस्कार प्रदान केला जाईल. हे संमेलन पुणे येथील फर्ग्युसन महाविद्यालयाच्या फिरोदिया ऑडिटोरियममध्ये 21 व 22 फेब्रुवारी रोजी होणार आहे. “अनुवादातून राष्ट्रभक्ती” ही या संमेलनाची संकल्पना आहे. ज्येष्ठ अनुवादक डॉ. शुचिता फडके संमेलनाच्या अध्यक्षस्थानी असून, ज्येष्ठ अनुवादक डॉ. रवींद्र गुर्जर स्वागताध्यक्ष आहेत. संमेलनाचे उद्घाटन 21 फेब्रुवारी रोजी सकाळी 10 वाजता खा. डॉ. मेधा कुलकर्णी आणि राष्ट्रीय स्वयंसेवक संघाचे पुणे महानगर संघचालक रवींद्र वंजारवाडकर यांच्या हस्ते होईल. हे संमेलन सर्वांसाठी विनामूल्य खुले असून, अनुवाद जिज्ञासू, संशोधक आणि विद्यार्थ्यांनी सहभागी होण्याचे आवाहन संयोजकांनी केले आहे. पहिल्या दिवशी, 21 फेब्रुवारी रोजी, अनुवादविषयक विविध व्याख्याने व चर्चासत्रे आयोजित करण्यात आली आहेत. यामध्ये कृत्रिम बुद्धिमत्ता आणि अनुवाद (डॉ. प्रांजली देशपांडे), प्रशासकीय सेवेतील अनुवादाच्या संधी (सुश्रुत कुलकर्णी), पेटंट व शास्त्रीय अनुवाद (दीपक झेमसे) आणि अनुवादातील खाचाखोचा (विदुला टोकेकर) या विषयांवर मार्गदर्शन होईल. डॉ. शुचिता फडके ‘राष्ट्रनिर्मितीसाठी अनुवाद’ या विषयावर बोलतील. दुसऱ्या दिवशी, 22 फेब्रुवारी रोजी सकाळी 10 वाजता ‘ओळख देशभक्तांची’ या उपक्रमाचा संकल्पपूर्ती समारंभ लोकमान्य मल्टिपर्पज सोसायटीचे अध्यक्ष किरण ठाकूर यांच्या प्रमुख उपस्थितीत होईल. दुपारी 12 वाजता जीवनगौरव पुरस्कार प्रदान केले जातील. यावेळी मराठवाडा शिक्षण प्रसारक मंडळाचे विवेक भोसले, पर्यावरणप्रेमी डॉ. स्वयंप्रभादेवी मोहिते पाटील आणि मराठीकाका अनिल गोरे उपस्थित राहतील. ट्रस्टचे अध्यक्ष चंद्रकांत शहासने आणि संयोजिका तेजाली शहासने यांनी ही माहिती दिली. प्रकाशक व साहित्यप्रेमी भालचंद्र कुलकर्णी आणि प्रा. वैशाली कार्लेकर हे संमेलनाचे निमंत्रक आहेत.