महाराष्ट्रातील प्रमुख तीर्थक्षेत्र आणि 12 ज्योतिर्लिंगांपैकी एक असलेल्या श्री क्षेत्र त्र्यंबकेश्वर मंदिराबाबत मोठी बातमी समोर आली आहे. आगामी सिंहस्थ कुंभमेळ्याच्या पार्श्वभूमीवर त्र्यंबकेश्वर मंदिर काही काळ भाविकांच्या दर्शनासाठी बंद ठेवण्याचा निर्णय घेण्यात येत आहे. मंदिर परिसरातील प्रस्तावित विकासकामे, रस्ते विस्तारीकरण आणि भाविकांच्या गर्दीचे नियोजन लक्षात घेऊन हा निर्णय घेतला जात आहे. प्राथमिक नियोजनानुसार 15 किंवा 16 ऑक्टोबरपासून पुढील दोन महिन्यांसाठी भाविकांना मंदिरात प्रवेश बंद केला जाण्याची शक्यता आहे. मात्र, मंदिर बंद ठेवण्याची अंतिम तारीख आणि कालावधी याबाबत देवस्थान ट्रस्टकडून अधिकृत घोषणा केली जाणार आहे. कुंभमेळा मंत्री गिरीश महाजन यांनी देवस्थान ट्रस्ट आणि जिल्हा प्रशासनाला आवश्यक नियोजन करण्याच्या सूचना दिल्या आहेत. मंदिर बंद असले तरी धार्मिक विधी सुरूच राहणार भाविकांसाठी मंदिराचे दर्शन बंद करण्यात येणार असले, तरी त्र्यंबकेश्वर ज्योतिर्लिंगाच्या धार्मिक परंपरांमध्ये कोणताही खंड पडणार नाही. मंदिरातील नित्यपूजा, त्रिकाल पूजा आणि इतर पारंपरिक धार्मिक विधी नियमितपणे सुरू राहणार आहेत. त्यामुळे दर्शनासाठी भाविकांना प्रवेश नसला तरी देवस्थानातील दैनंदिन धार्मिक व्यवस्था पूर्वीप्रमाणेच सुरू राहणार आहे. त्र्यंबकेश्वर मंदिरात वर्षभर देशाच्या विविध भागांतून मोठ्या संख्येने भाविक दाखल होतात. विशेषतः धार्मिक पर्व, सुट्ट्या आणि पितृकर्माच्या काळात मंदिर परिसरात मोठी गर्दी होते. आगामी सिंहस्थ कुंभमेळ्याच्या तयारीदरम्यान ही गर्दी आणखी वाढण्याची शक्यता असल्याने प्रशासनाकडून सुरक्षेच्या दृष्टीने खबरदारी घेतली जात आहे. विकासकामांदरम्यान गर्दी टाळण्यासाठी निर्णय सिंहस्थ कुंभमेळ्याच्या पार्श्वभूमीवर त्र्यंबकेश्वर शहर आणि मंदिर परिसरात मोठ्या प्रमाणावर विकासकामे हाती घेण्यात येणार आहेत. यामध्ये रस्ते विस्तारीकरण, पायाभूत सुविधांचा विकास आणि भाविकांच्या वाहतुकीशी संबंधित कामांचा समावेश आहे. या कामांच्या काळात मंदिर परिसरात मोठ्या प्रमाणात भाविकांची गर्दी झाल्यास वाहतूक कोंडी, अपघात किंवा चेंगराचेंगरीसारखी परिस्थिती निर्माण होण्याची शक्यता आहे. त्यामुळे भाविकांची सुरक्षितता आणि विकासकामे सुरळीतपणे पूर्ण करण्यासाठी मंदिर काही काळ दर्शनासाठी बंद ठेवण्याचा निर्णय घेण्यात येत आहे. मंदिर परिसर भाविकांच्या गर्दीपासून मोकळा राहिल्यास प्रशासनाला कुंभमेळ्याशी संबंधित कामे अधिक वेगाने पूर्ण करता येणार आहेत. 12 ऑक्टोबरपर्यंत VIP दर्शनालाही बंदी दरम्यान, सध्या पितृपक्षामुळे त्र्यंबकेश्वरमध्ये भाविकांची मोठी गर्दी पाहायला मिळत आहे. देशभरातून भाविक पितृकर्म आणि विविध धार्मिक विधींसाठी त्र्यंबकेश्वरमध्ये दाखल होत आहेत. त्यातच शनिवार-रविवारच्या सुट्ट्यांमुळे मंदिर परिसरात गर्दीत मोठी वाढ झाली आहे. ही परिस्थिती लक्षात घेऊन देवस्थान ट्रस्टने 12 ऑक्टोबरपर्यंत VIP दर्शन बंद ठेवण्याचा निर्णय घेतला आहे. सर्वसामान्य भाविकांना तुलनेने सुलभ आणि सुरक्षित दर्शन मिळावे तसेच प्रशासनावरील अतिरिक्त ताण कमी व्हावा, हा त्यामागचा उद्देश आहे. मात्र, केंद्र किंवा राज्य शासन तसेच जिल्हाधिकाऱ्यांच्या माध्यमातून प्राप्त होणाऱ्या राज्यशिष्टाचाराच्या (Protocol) पत्रांद्वारे येणाऱ्या व्यक्तींना या निर्णयातून अपवाद देण्यात आला आहे. अंतिम तारीख लवकरच जाहीर होणार त्र्यंबकेश्वर मंदिर दोन महिन्यांसाठी बंद ठेवण्याचा निर्णय भाविकांसाठी महत्त्वाचा ठरणार आहे. त्यामुळे बाहेरगावाहून त्र्यंबकेश्वर दर्शनासाठी येणाऱ्या भाविकांनी मंदिर प्रशासनाकडून होणाऱ्या अधिकृत घोषणेकडे लक्ष देणे आवश्यक आहे. दरम्यान, 15 किंवा 16 ऑक्टोबरपासून मंदिर बंद करण्याचे प्राथमिक नियोजन असले तरी अंतिम तारीख देवस्थान ट्रस्ट आणि प्रशासनाकडून निश्चित केली जाणार आहे. सिंहस्थ कुंभमेळ्याच्या तयारीला गती देताना भाविकांची सुरक्षितता आणि धार्मिक परंपरा यांचा समतोल राखण्याचे आव्हान प्रशासनासमोर असणार आहे. हेही वाचा… दुष्काळ, कर्जवसुली आणि पीकविम्यावर रविकांत तुपकर आक्रमक:आठवडाभरात निर्णय न झाल्यास राज्यव्यापी आंदोलनाचा इशारा मराठवाड्यासह राज्यातील दुष्काळी परिस्थिती, घटलेले पीक उत्पादन आणि वाढता कर्जबोजा यामुळे शेतकरी आर्थिक संकटात सापडला असल्याचा आरोप करत क्रांतिकारी शेतकरी संघटनेने सरकारविरोधात आक्रमक भूमिका घेतली आहे. शेतकरी नेते रविकांत तुपकर यांच्या नेतृत्वाखाली संघटनेच्या पदाधिकाऱ्यांनी छत्रपती संभाजीनगर येथे विभागीय आयुक्तांची भेट घेतली. यावेळी दुष्काळग्रस्त शेतकऱ्यांना तातडीने आर्थिक मदत, सरसकट कर्जमाफी, पीकविम्याची रक्कम, नियमित कर्जदारांना प्रोत्साहनपर अनुदान तसेच मायक्रोफायनान्स कंपन्या आणि खासगी पतसंस्थांच्या कर्जवसुलीला लगाम घालण्याची मागणी करण्यात आली. सविस्तर वाचा…