पुणे आणि पिंपरी-चिंचवड महानगरपालिका निवडणुकांमध्ये गुन्हेगारी पार्श्वभूमी असलेल्या उमेदवारांचा भरणा वाढल्याने राजकीय वातावरण तापले आहे. राष्ट्रवादी काँग्रेसच्या अजित पवार गटाने आणि इतर काही पक्षांनी आंदेकर, मारणे, बापू नायर आणि टिपू पठाण यांसारख्या क
.
पुण्यातील उमेदवारी वाटपात गुन्हेगारी पार्श्वभूमी असलेल्यांची यादी धडकी भरवणारी आहे. पुणे पोलिसांनी तयार केलेल्या यादीत आंदेकर टोळीचे नाव आघाडीवर आहे. प्रभाग 23 मधून निवडणूक लढवणाऱ्या सोनाली आंदेकर आणि लक्ष्मी आंदेकर या सध्या ‘आयुष्य कोमकर’ हत्या प्रकरणात येरवडा कारागृहात आहेत. विशेष म्हणजे, टोळीचा म्होरक्या बंडू आंदेकर याने हातात बेड्या असतानाच उमेदवारी अर्ज दाखल केला. या सर्वांवर ‘मोक्का’ अंतर्गत कारवाई करण्यात आली आहे.
मारणे आणि कोमकर: कुख्यात गुंड गजानन मारणे याची पत्नी जयश्री मारणे आणि गणेश कोमकरची पत्नी कल्याणी कोमकर यांनाही उमेदवारी मिळाल्याने पुण्याचे राजकारण गुन्हेगारांच्या हाती जाणार का, असा प्रश्न उपस्थित होत आहे. राष्ट्रवादीने प्रभाग 39 मधून बापू नायर (हत्या आणि खंडणीचे गुन्हे) यालाही मैदानात उतरवले आहे.
फडणवीसांच्या टेबलावर 20 जणांची यादी
गुन्हेगारांच्या या राजकीय घुसखोरीची गंभीर दखल घेत पुणे शहर पोलिसांनी 20 जणांची एक गोपनीय यादी तयार करून ती थेट गृहमंत्री देवेंद्र फडणवीस यांच्याकडे सोपवली आहे. या उमेदवारांकडून मतदारांना धमकावणे, पैशांचा वापर करणे किंवा दहशत निर्माण करणे असे प्रकार रोखण्यासाठी पोलिसांनी एक विशेष ‘निरीक्षण समिती’ स्थापन केली आहे. २० उमेदवार आणि त्यांचे समर्थक प्रचारादरम्यान काय करतात, यावर पोलिसांची ‘घारीसारखी नजर’ असणार आहे.
पिंपरीत गुन्हेगारी पार्श्वभूमीचे 34 उमेदवार रिंगणात
केवळ पुणेच नाही, तर पिंपरी-चिंचवडमध्येही गुन्हेगारी पार्श्वभूमी असलेल्या उमेदवारांचा सुळसुळाट झाला आहे. १५ जानेवारीला होणाऱ्या मतदानासाठी रिंगणात असलेल्या उमेदवारांची आकडेवारी धक्कादायक आहे. गुन्हेगारी पार्श्वभूमीच्या उमेदवारांमध्ये भाजपचे 17, राष्ट्रवादी काँग्रेसचे 13, शिवसेनेचे 4 जण आहेत. यात दोन महिला उमेदवारही आहेत.पोलिसांच्या दप्तरी राजकीय गुंड म्हणून नोंद असणारे भाजपचे 8, राष्ट्रवादीचे 7 आणि शिवसेनेच्या 2 जणांचा समावेश आहे. तर गुन्हेगारी पार्श्वभूमी असलेल्या 8 पती राजांच्या पत्नी उमेदवार म्हणून रिंगणात आहेत.
