एपस्टीन फाईल्स प्रकरणातील खुलाशांवर केंद्र सरकार आणि पंतप्रधान नरेंद्र मोदींच्या कथित मौनाविरोधात महाराष्ट्र प्रदेश युवक काँग्रेसने पुण्यात आंदोलन केले. शुक्रवारी बालगंधर्व चौकात तीव्र निदर्शने आणि रास्ता रोको करण्यात आला. हे आंदोलन महाराष्ट्र प्रदेश युवक काँग्रेसचे अध्यक्ष शिवराज मोरे यांच्या प्रमुख उपस्थितीत झाले. यावेळी युवक काँग्रेसचे प्रसारमाध्यम विभागाचे अध्यक्ष अक्षय जैन, निरीक्षक ॲड. विवेक गावंडे, शहराध्यक्ष सौरभ अमराळे यांच्यासह अनेक कार्यकर्ते उपस्थित होते. आंदोलनादरम्यान, युवक काँग्रेसच्या कार्यकर्त्यांनी केंद्र सरकारविरोधात जोरदार घोषणाबाजी केली आणि रास्ता रोको करण्याचा प्रयत्न केला. पोलिसांनी आंदोलनकर्त्यांना ताब्यात घेतले. यामुळे काही काळ परिसरात तणावपूर्ण परिस्थिती निर्माण झाली होती. यावेळी बोलताना महाराष्ट्र प्रदेश युवक काँग्रेसचे अध्यक्ष शिवराज मोरे यांनी केंद्र सरकारवर गंभीर आरोप केले. ते म्हणाले की, एपस्टीन फाईल्समधील खुलाशांनी जगभरात खळबळ उडवली आहे, मात्र भाजप सरकार यावर मौन बाळगून आहे. पंतप्रधान मोदींचे मौन संशयास्पद असून, जर सत्ताधाऱ्यांना सत्याची भीती नसेल, तर त्यांनी स्वतंत्र आणि निष्पक्ष चौकशीची घोषणा करावी, अशी मागणी मोरे यांनी केली. युवक काँग्रेस सरकारच्या या भूमिकेविरोधात रस्त्यावर उतरून आंदोलन करत राहील, असेही त्यांनी स्पष्ट केले. युवक काँग्रेसच्या प्रसारमाध्यम विभागाचे अध्यक्ष अक्षय जैन यांनीही सरकारवर टीका केली. ते म्हणाले की, भाजप सरकारला प्रश्न विचारणाऱ्यांचा आवाज दाबण्याची जुनी सवय आहे. एपस्टीन प्रकरण हा जागतिक मुद्दा असून, इतक्या संवेदनशील विषयावरही पंतप्रधान मोदी आणि भाजप सरकार भूमिका स्पष्ट करत नाहीत, हे संशयास्पद आहे. मोदी सरकार आणि अमेरिकन सरकारमध्ये पडद्यामागे ‘बार्गेनिंग’ सुरू असल्याची माहिती आमच्याकडे आहे. भारताने अमेरिकेवर कोणतेही शुल्क लावू नये, यासाठी सौदेबाजी केली जात असल्याचा आरोप जैन यांनी केला.
एपस्टीन फाईल्स: युवक काँग्रेसचे केंद्र सरकारविरोधात पुण्यात आंदोलन:पंतप्रधान मोदींच्या मौनावर प्रश्नचिन्ह, बालगंधर्व चौकात रास्ता रोको
