राज्य निवडणूक आयोगाच्या निर्देशानुसार, पुणे जिल्हा परिषद आणि पंचायत समिती निवडणुकीसाठी संपूर्ण यंत्रणा सज्ज असल्याची माहिती जिल्हाधिकारी तथा जिल्हा निवडणूक अधिकारी जितेंद्र डुडी यांनी दिली आहे. मतदान अधिकाऱ्यांनी जबाबदारीने कर्तव्य बजावावे आणि पात्र मतदारांनी उत्स्फूर्तपणे मतदान करावे, असे आवाहन त्यांनी पत्रकार परिषदेत केले. नागरिक आणि राजकीय पक्षांनी आदर्श आचारसंहितेचे पालन करून शांततेत निवडणूक प्रक्रिया पार पाडावी, असेही ते म्हणाले. जिल्हा परिषदेच्या ७३ गट आणि पंचायत समितीच्या १४६ गणांसाठी शनिवार, ७ फेब्रुवारी २०२६ रोजी मतदान होणार आहे. मतदानाची वेळ सकाळी ७.३० ते सायंकाळी ५.३० अशी असून, मतदानापूर्वी मॉक पोल घेतला जाईल. मतदानाच्या दिवशी, म्हणजेच ७ फेब्रुवारी रोजी, मुद्रित, इलेक्ट्रॉनिक किंवा समाज माध्यमांमध्ये कोणत्याही प्रकारच्या जाहिराती प्रसिद्ध किंवा प्रसारित करता येणार नाहीत. मतदारांना त्यांचा मतदानाचा हक्क बजावता यावा यासाठी संबंधित जिल्हा परिषद व पंचायत समिती कार्यक्षेत्रात ३ फेब्रुवारीच्या महाराष्ट्र शासनाच्या अधिसूचनेद्वारे शनिवार, ७ फेब्रुवारी रोजी सार्वजनिक सुट्टी जाहीर करण्यात आली आहे. ही सुट्टी मतदार संघाच्या क्षेत्रातील जे मतदार कामासाठी त्या मतदार संघाच्या बाहेर असतील त्यांनाही लागू राहील. केंद्र शासनाच्या शासकीय, निमशासकीय कार्यालये, सार्वजनिक उपक्रम, बँका आदींनाही ही सार्वजनिक सुट्टी लागू असेल. जिल्हाधिकारी डुडी यांनी जिल्ह्यातील अधिकाधिक मतदारांना मतदान केंद्रावर जाऊन मतदानाचा हक्क बजावण्याचे आवाहन केले आहे. जिल्ह्यात एकूण ३ हजार ६०५ मतदान केंद्रे आहेत. यामध्ये बारामती तालुक्यात २९९, मावळ २४३, मुळशी २२७, शिरूर ३३७, हवेली २६३, दौंड ३१७, इंदापूर ४००, पुरंदर २३५, भोर २३७, वेल्हे १०५, आंबेगाव २३९, जुन्नर ३६६ आणि खेड ३३७ मतदान केंद्रांचा समावेश आहे. प्रत्येक तालुक्यात एक याप्रमाणे १३ आदर्श व महिला मतदान केंद्रे, तसेच हवेली, भोर आणि इंदापूर तालुक्यात प्रत्येकी एक याप्रमाणे ३ परदानशीन मतदान केंद्रे आहेत. मतदान प्रक्रियेसाठी १४ हजार ३१८ बॅलेट युनिट, ५ हजार ८१३ कंट्रोल युनिट यंत्र, ३ हजार ९६८ मेमरी चीप आणि ३ हजार ९९१ बॅटरी वितरित करण्यात आल्या आहेत.
पुणे जिल्हा परिषद, पंचायत समिती निवडणूक; यंत्रणा सज्ज:जिल्हाधिकारी जितेंद्र डुडी यांचे शांततेत प्रक्रिया पार पाडण्याचे आवाहन
