जंग मे जाने वाले घोडे, बारातो मे नही नाचा करते…:खासदार प्रतिभा धानोरकर यांचे सूचक स्टेटस चर्चेत; चंद्रपूर काँग्रेस वादावर आज दिल्लीत मंथन

चंद्रपूर महानगरपालिकेतील काँग्रेसचा अंतर्गत वाद दिवसेंदिवस अधिक तीव्र होताना दिसत आहे. अशा पार्श्वभूमीवर काँग्रेसच्या खासदार प्रतिभा धानोरकर यांनी आज व्हॉट्सॲपवर टाकलेले सूचक स्टेटस राजकीय वर्तुळात चर्चेचा विषय ठरले आहे. जंग मे जाने वाले घोडे, बारातो मे नही नाचा करते… असा आशय असलेल्या या स्टेटसमुळे अनेक राजकीय अर्थ काढले जात असून, काँग्रेसमधील अंतर्गत संघर्ष अधिक उघड झाला आहे. दरम्यान, चंद्रपूर महानगरपालिकेतील सत्तास्थापनेच्या पेचावर तोडगा काढण्यासाठी आज दिल्लीत महत्त्वाची बैठक होणार आहे. काँग्रेसचे सरचिटणीस के. सी. वेणुगोपाल यांच्या अध्यक्षतेखाली दुपारी 12 नंतर ही बैठक पार पडणार असून, यामध्ये महाराष्ट्र काँग्रेसचे प्रदेशाध्यक्ष हर्षवर्धन सपकाळ, आमदार विजय वडेट्टीवार, खासदार प्रतिभा धानोरकर, माजी मंत्री सुनील केदार तसेच राज्याचे सहप्रभारी कुणाल चौधरी उपस्थित राहणार असल्याची माहिती आहे. पक्षातील गटबाजी, त्याचा सत्तास्थापनेवर होणारा परिणाम तसेच शिवसेना (उबाठा) कडून महापौर पदाबाबत घालण्यात आलेली अट या मुद्द्यांवर सविस्तर चर्चा होण्याची शक्यता आहे.
वडेट्टीवार-धानोरकरात उफाळला वाद चंद्रपूर महानगरपालिकेत काँग्रेसचे 27 नगरसेवक निवडून आल्यानंतर काँग्रेसची सत्ता निश्चित मानली जात होती. मात्र निकालानंतरपासूनच आमदार विजय वडेट्टीवार आणि खासदार प्रतिभा धानोरकर यांच्यातील वाद उफाळून आला. धानोरकर गटातील 13 नगरसेवकांनी 23 जानेवारी रोजी नागपूरच्या विभागीय आयुक्त कार्यालयात स्वतंत्र गट नोंदवला. त्याच दिवशी वडेट्टीवार गटाने याला आक्षेप घेत काँग्रेसची एकत्रित गटनोंदणी करावी, अशी मागणी केली होती. नगरसेवकांना मतदान करता येणार का? या प्रकरणी विभागीय आयुक्त कार्यालयाने प्रस्ताव शासनाकडे पाठवून नियमानुसार निर्णय घेण्याची शिफारस केल्याचे समजते. दरम्यान, 10 फेब्रुवारी रोजी चंद्रपूर महानगरपालिकेच्या महापौर पदाची निवडणूक होणार आहे. तोपर्यंत काँग्रेसच्या गटनोंदणीचा वाद सुटला नाही, तर नोंदणी न झालेल्या नगरसेवकांना मतदानाचा अधिकार मिळणार की नाही, असा प्रश्न उपस्थित झाला आहे. काँग्रेस नगरसेवक दोन गटात विभागले सध्या काँग्रेसचे नगरसेवक दोन गटांत विभागले गेले असून, आमदार वडेट्टीवार गटाकडे 20 तर खासदार धानोरकर गटाकडे 7 नगरसेवक असल्याची माहिती आहे. अशातच वडेट्टीवार गटाचे नगरसेवक राजेश अडूर यांनी काँग्रेसच्या सर्व 27 नगरसेवकांची बैठक बोलावली. मात्र या बैठकीची नोटीस धानोरकर गटातील नगरसेवकांच्या प्रत्यक्ष हाती न देता त्यांच्या निवासस्थानी लावण्यात आल्याने नव्या वादाला तोंड फुटले आहे.