घरात घुसून महिलेला चाकूचा धाक दाखवत मोबाइल आणि सोन्याचे दागिने लुटणाऱ्या दोघांना चांदूर रेल्वे पोलिसांनी पकडले आहे. या प्रकरणात पोलिसांनी एका लूटारुला मध्य प्रदेशातून ताब्यात घेतले. त्यानंतर त्याच्या माहीतीवरुन त्याच्या दुसऱ्या साथीदारालाही अटक करण्यात आली आहे. रविवारी (दि. १) ही कारवाई करण्यात आली आहे. अनिलकुमार सुखराम उईके (२४, रा.नाहरबेली, जि.मांडला, मध्यप्रदेश) आणि देवेंद्र महेंद्र पवार (२०, रा. राजीव गांधीनगर, चांदूर रेल्वे) अशी अटक केलेल्या लूटारुंची नावे आहेत. २९ नोव्हेंबर २०२५ रोजी रात्रीच्या सुमारास एका महिलेच्या घरात दोन अज्ञात व्यक्ती शिरले होते. त्यांनी चाकूचा धाक दाखवून महिलेकडील मोबाइल आणि २ ग्रॅमचे सोन्याचे कानातले जबरदस्तीने हिसकावून नेले होते. या घटनेमुळे परिसरात भीतीचे वातावरण पसरले होते. चांदूर रेल्वे पोलिसांनी या प्रकरणी गुन्हा दाखल केला होता. तपासादरम्यान तांत्रिक माहितीच्या आधारे चोरी गेलेला मोबाइल मध्यप्रदेशातील मांडला जिल्ह्यात असल्याचे समोर आले होते. त्यावेळी चांदूरचे ठाणेदार अजय आकरे यांच्या मार्गदर्शनात पोलिसांचे एक पथक मध्य प्रदेशात रवाना झाले. पोलिसांनी अनिलकुमार उईकेला ३१ जानेवारी रोजी ताब्यात घेतले. त्याची कसून चौकशी केली असता, त्याने हा मोबाइल चांदूर रेल्वे येथील देवेंद्र महेंद्र पवार याच्याकडून घेतल्याची कबुली दिली. पोलिसांनी तातडीने देवेंद्र पवार यालाही ताब्यात घेतले आहे.
चाकूच्या धाकावर घरात जाऊन दागिने लुटणारे चोरटे अटकेत:एकाला मध्यप्रदेशातून ठोकल्या बेड्या, दोघांना अटक
