पुणे मंडईत नव्या विद्युत दिव्यांची सोय:नगरसेवक बाप्पु मानकर यांच्या पुढाकाराने तीन दिवसांत काम पूर्ण

पुण्याच्या मध्यवस्तीतील ऐतिहासिक महात्मा फुले मंडईतील अपुऱ्या प्रकाश व्यवस्थेची समस्या अवघ्या तीन दिवसांत दूर करण्यात आली आहे. नवनिर्वाचित नगरसेवक राघवेंद्र बाप्पु मानकर यांच्या पुढाकाराने मंडईत नवे विद्युत दिवे बसवण्यात आले असून, यामुळे पुरेसा प्रकाश उपलब्ध झाल्याने व्यापाऱ्यांनी समाधान व्यक्त केले आहे. १३५ वर्षांचा ऐतिहासिक वारसा लाभलेली महात्मा फुले मंडई ही पुण्याची एक प्रमुख बाजारपेठ आहे. तीन दिवसांपूर्वी नगरसेवक मानकर यांनी मंडईला भेट दिली असता, व्यापाऱ्यांनी त्यांना प्रकाश व्यवस्थेतील अडचणींची माहिती दिली. येथील विद्युत दिव्यांची क्षमता कमी झाल्याने आणि अनेक दिवे नादुरुस्त झाल्याने सायंकाळच्या वेळी व्यापारी व नागरिकांना अडचणी येत होत्या. या समस्येवर तातडीने उपाययोजना म्हणून जुने दिवे बदलण्याचे काम हाती घेण्यात आले. हे काम वेगाने पूर्ण करण्यात आले आणि तीन दिवसांत मंडईत नव्या प्रकाश व्यवस्थेची सोय झाली. काम पूर्ण झाल्यानंतर बाप्पु मानकर यांनी पुन्हा मंडईला भेट देऊन पाहणी केली. यावेळी बोलताना नगरसेवक राघवेंद्र मानकर म्हणाले, “व्यापारी आणि नागरिकांना भेडसावणारी ही समस्या सोडवण्यासाठी तातडीने काम हाती घेतले. येथील अनेक दिव्यांची क्षमता कमी झाल्याने ५० नवे दिवे बसवण्यात आले आहेत. आता पुरेशी प्रकाश व्यवस्था झाली आहे. ही तातडीची गरज म्हणून काम करण्यात आले असून, लवकरच संपूर्ण मंडई परिसरातील विद्युत दिव्यांचे काम हाती घेण्यात येणार आहे. मंडईतील इतर समस्यांबाबतही मी नेहमी कटिबद्ध राहीन.” मंडईतील व्यापाऱ्यांनी सांगितले की, “जुने झालेले विद्युत दिवे आणि अपुऱ्या प्रकाशव्यवस्थेमुळे व्यापारी तसेच खरेदीसाठी येणाऱ्या नागरिकांच्या सुरक्षेचा प्रश्न निर्माण होत होता. बाप्पु मानकर यांना ही बाब निदर्शनास आणून देताच, त्यांनी त्वरित हे काम सुरू केले आणि वेगाने पूर्ण केले. त्यांच्या या कार्याबद्दल आम्ही समाधानी आहोत.”