मुंबई हादरली:महापे एमआयडीसीतील केमिकल कंपनीत आग, धुराचे लोळ दूरवर; आगीच्या ज्वाळा बहुमजली इमारतींच्या उंचीपेक्षाही मोठ्या

मुंबईतील औद्योगिक पट्टा म्हणून ओळखल्या जाणाऱ्या महापे एमआयडीसी परिसरात शनिवारी दुपारी अचानक भीषण आगीची घटना घडली. येथील ‘बिटाकेम’ नावाच्या केमिकल कंपनीला लागलेल्या आगीमुळे संपूर्ण परिसरात एकच खळबळ उडाली. दुपारच्या सुमारास ही आग लागली असून, काही क्षणांतच आगीने उग्र रूप धारण केले. आगीच्या ज्वाळा इतक्या भयानक होत्या की त्या बहुमजली इमारतींच्या उंचीपेक्षाही मोठ्या दिसत होत्या. आगीमुळे निर्माण झालेले धुराचे प्रचंड लोळ दूरवरूनही स्पष्टपणे दिसत होते, त्यामुळे नागरिकांमध्ये भीतीचे वातावरण पसरले. मिळालेल्या प्राथमिक माहितीनुसार, महापे एमआयडीसीतील W-177 क्रमांकाच्या ‘बिटाकेम’ या केमिकल कंपनीत ही आग लागली. या कंपनीत मोठ्या प्रमाणावर रासायनिक पदार्थांचा साठा असल्यामुळे आगीचा फैलाव झपाट्याने झाला. आगीची तीव्रता पाहता सुरुवातीपासूनच परिस्थिती गंभीर असल्याचे चित्र होते. कंपनीच्या परिसरातून मोठ्या आवाजासह ज्वाळा बाहेर येत असल्याने आसपासच्या उद्योगांमध्ये काम करणाऱ्या कामगारांमध्ये घबराट निर्माण झाली. अनेकांनी सुरक्षिततेच्या कारणास्तव परिसर सोडून बाहेर पडणे पसंत केले. आगीची माहिती मिळताच अग्निशमन दलाला तातडीने पाचारण करण्यात आले. काही वेळातच अग्निशमन दलाच्या गाड्या घटनास्थळी दाखल झाल्या. सध्या आग आटोक्यात आणण्यासाठी अग्निशमन दलाचे जवान शर्थीचे प्रयत्न करत आहेत. केमिकल कंपनी असल्यामुळे आग विझवताना विशेष खबरदारी घेतली जात आहे. रासायनिक पदार्थांमुळे आग अधिक भडकू नये, यासाठी अग्निशमन दलाकडून नियंत्रित पद्धतीने पाण्याचा मारा केला जात आहे. किमान चार ते पाच अग्निशमन गाड्या घटनास्थळी कार्यरत असून, परिस्थितीवर सतत लक्ष ठेवण्यात येत आहे. या भीषण आगीमुळे परिसरातील वाहतूक आणि कामकाज काही काळ विस्कळीत झाले होते. मात्र, सुदैवाने या घटनेत आतापर्यंत कोणतीही जीवितहानी झाल्याचे वृत्त समोर आलेले नाही. आगीचे नेमके कारण अद्याप स्पष्ट झाले नसून, आग आटोक्यात आल्यानंतरच कारणांचा शोध घेतला जाणार असल्याची माहिती आहे. महापे एमआयडीसीसारख्या दाट औद्योगिक परिसरात घडलेल्या या घटनेमुळे औद्योगिक सुरक्षेचा प्रश्न पुन्हा एकदा ऐरणीवर आला आहे. नागरिक आणि कामगारांकडून सुरक्षिततेच्या उपाययोजनांबाबत अधिक कडक नियमांची मागणी केली जात आहे. आम्ही हे सातत्याने अपडेट करत आहोत…